DTX: Terrorçulara maliyyə daşıyan azərbaycanlılar həbs edilib

Bakı/23.11.18/Turan: Suriyada BMT-nin terror təşkilatı saydığı bilrliklərin tərkibində terror aktları törədən şəxslərin maliyyə mənbələrinin aşkar edildiyi bildirilir. Bu haqda Dövlət Təhlükəsizliyi Xidmətinin (DTX) məlumatında yazılır.

DTX-nın açıqlamasına görə, bu qurumda Cinayət Məcəlləsinin 214-1 (terrorçuluğu maliyyələşdirmə), 218.2 (cinayətkar birlikdə iştirak etmə), 283-1.3 (Azərbaycan Respublikasının hüdudlarından kənarda aparılan silahlı münaqişələrdə iştirak etmə) maddələri ilə cinayət işi başlanılıb və istintaq-əməliyyat tədbirləri aparılır.

Həmin cinayət işi çərçivəsində Azərbaycan vətəndaşları İlqar Ağayev, Sahil İbrahimov, Namiq Məmmədovun məsuliyyətə cəlb edildiyi, barələrində həbs qətimkan tədbiri seçildiyi bildirilir.

Məlumatda iddia olunur ki, adları çəkilən şəxslər və digərləri 2017-ci ilin oktyabr ayından ayrı-ayrı ölkələrdəki terror təşkilatlarından, habelə həmin silahlı münaqişələrdə iştirak edənlərin yaxınlarından aldıqları pul vəsaitlərini müntəzəm olaraq Suriyaya göndərilməsini və çatdırılmasını təmin ediblər.

Əldə edilən və Suriyaya göndərilən vəsaitlərin məbləğinin ümumilikdə 500 000 dollardan çox olduğu bildirilir.

Açıqlamada cinayət işi üzrə araşdırmaların davam etdiyi qeyd edilir.-0-