Ekspertlər Bakıya Ermənistanın 30 il həyata keçirdiyi siyasəti həyata keçirməyi təklif edirlər

Bakı/14.05.21/Turan: Laçın rayonunda Qaragöl gölü ətrafındakı ərazi uğrunda yeni müharibə ona görə olmayacaq ki, Ermənistanın Azərbaycanla müharibə aparmaq imkanı yoxdur. Amma kiçik qarşıdurmalar ola bilər, Milli Məclisin deputatı Rasim Musabayev Azərbaycan və Ermənistan arasında son iki gündə baş verən gərginliyi şərh edərkən belə deyib.

Yerevan Azərbaycanı Qaragöl gölü bölgəsində Ermənistan ərazisinin, müxtəlif qiymətləndirmələrə görə, 2-3 kilometrini işğal etməkdə ittiham edir. Azərbaycan Xarici İşlər Nazirliyinin 13 may tarixli bəyanatında bu ittihamlar təkzib edilir, Bakı Azərbaycanın qanuni sərhədlərinin dəqiqləşdirildiyini və möhkəmləndirildiyini bildirir.

Musabəyovun fikrincə, Ermənistan Azərbaycanın Qazax rayonunda 7 kəndi və Dağlıq Qarabağda böyük ərazini işğal edib.

“Qoy əvvəlcə Yerevan və onun himayədarları bununla bağlı cavab versinlər, Ermənistanın Azərbaycan torpaqlarını işğal etməsinə qiymət versinlər. Ermənistan öz qoşunlarını bizim ərazilərimizdən çıxarmadan Azərbaycanın hərəkətlərini qınamamalıdır”, Musabəyov belə deyir.

“Qaragöl gölü və onun ətrafındakı ərazi ilə bağlı mübahisənin həllinə gəlincə, Azərbaycan tərəfi 9 (10) noyabr 2020-ci il tarixində imzalanmış üçtərəfli saziş çərçivəsində hərəkət edir. Bu hadisələrin arxasında siyasət axtarmaq lazım deyil, sadəcə olaraq əsgərlərimiz sazişə uyğun olaraq GPS-dən istifadə ilə sərhədimizi dəqiqləşdirir və möhkəmləndirirlər”, deyə deputat bildirib.

Onun fikrincə, Ermənistan Azərbaycanın ərazi bütövlüyünü tanımadan bizi işğalda ittiham edə bilməz. Əgər belədirsə, Azərbaycan müvafiq siyasət həyata keçirir.

“Öz silahlı qüvvələrini Azərbaycan ərazisində saxlayan Ermənistan Azərbaycanı onun ərazilərini işğal etməkdə ittiham etməməlidir”, deyə deputat əlavə edib.

Azərbaycan Ermənistan ərazilərini işğal etməyib. Bizdən narazı olanlar ərazidə ölçmələr həyata keçirdikdən sonra, SSRİ dövrünün Kartoqrafiya və Geodeziya Komitəsinin sənədlərini və müasir texniki vasitələri rəhbər tutaraq məsələ ilə tanış olsunlar. SSRİ xəritələri hər iki tərəfdə var, sərhədlərin dəqiqləşdirilməsində problem olmayacaq, deyə keçmiş xarici işlər naziri Tofiq Zülfüqarov Turan-a bildirib.

Ekspert Ermənistanın Qarabağda gərginlik yaratması ilə əlaqədar yeni müharibənin başlaması mümkünlüyünü istisna etmir.

“Ermənilər birdən-birə ərazi bütövlüyündən danışmağa başlayıblar. Onlar texniki məsələləri siyasiləşdirirlər. Qoy ermənilər əvvəlcə bizim Qarabağımız, ermənilərin məskunlaşdığı Azərbaycan ərazisi haqqında qəzəbləndirici bəyanatlar səsləndirməyə son qoysunlar. Onlar təhqiramiz çıxışlarına son qoymasalar rəsmi Bakı bizim Zəngəzurdakı tarixi torpaqlarımız, 90-cı illərdə oradan qovulmuş azərbaycanlılar haqqında məsələni qaldırmalıdır. Azərbaycan Ermənistana ərazi iddiaları irəli sürməlidir. Ermənistanda azərbaycanlıların statusu məsələsi həll edilməyib. Biz ermənilərin 30 ildir davrandıqları kimi davranmalıyıq. Eyni siyasəti həyata keçirməliyik”, deyə Zülfüqarov bildirib.

Paşinyanın Kollektiv Təhlükəsizlik Müqaviləsi Təşkilatına şikayət etməsinə gəlincə, Zülfüqarov hesab edir ki, bu xahişlərə heç kim fikir verməyəcək.

“Azərbaycan ərazisində (Qarabağ nəzərdə tutulur) öz ordusunu saxlayan Ermənistan bizdən Qaragöl sahillərindən əsgərlərimizin çıxarılmasını tələb edə bilməz”, deyə Zülfüqarov bildirib. -0-