Ələsgər Məmmədlinin baş ağrıları artıb

"1 saylı Bakı İstintaq Təcridxanasında saxlanılan Toplum TV-nin təsisçisi Ələsgər Məmmədlinin kəskin baş ağrıları 3 gündür davam edir, həzm prosesi düzgün getmir, mədə rahatsızlıqları var". Bu barədə Məmmədlinin həyat yoldaşı Günay Məmmədli iyulun 15-də onunla telefon danışığından sonra bildirib.

"Ailəsi onun səhhəti ilə bağlı çox narahatdır. Təbii ki, bu problemlər stress, gərginlik və eyni zamanda böğazdakı şişlərlə əlaqəlidir", o, Facebook səhifəsində yazıb.

Belə ki, Ələsgər Məmmədlinin boğaz nahiyəsində şişlər var. İyulun 8-də ondan götürülmüş biopsiyanın nəticələrinə görə boğaz nahiyəsindəki şişin xoşxassəli olduğu müəyyən edilsə də, bu, onun ailəsini qane etmir.

Belə ki, Ələsgər Məmmədli həbsindən 1 saat öncə özəl klinikada ultrasəs müayinəsi olunub. O zaman qalxanvari vəzinin boyun hissəsində, sol payda 23 millimetr ölçüdə heterogen, periferik, vaskulyarizasiyalı TİRADS III düyün (50-75% xərçəng ehtimalı) aşkar edilib. Eləcə də qandan götürülən digər analizlərin cavabları da şişin təhlükəli xarakterli olması ehtimalından xəbər verib. Cərrah endokrinoloq biopsiya ilə yanaşı 10 tibbi komponent üzrə qan analizinin vacibliyini tövsiyə edib.

Ancaq təhlükəsizilik qüvvələri Ələsgər Məmmədlidən biopsiya götürülən zaman digər analizlərin götürülməsinə imkan verməyib. Beləliklə, biopsiyanın cavabları Ələsgər Məmmədlini və ailə üzvlərini qane etməyib.

"Bu nəticə xəstəliyin dəqiq diaqnozunu qoymaq üçün yetərli deyil. Cərrah endokrinoloq da USM (Ultrasəs müayinəsi) nəticələri ilə biopsiya nəticələri arasında uyğunsuzluq olduğunu bildirib. Tiroid Biopsiyası ilə yanaşı, TSH, ST4, Tireoglobulin, bilirubin fraksiyaları, GGT, ALT, AST, Amilaza, şəkər HbAıC, Kreatin, Qanın ümumi analizinin təcili verilməsini tövsiyə edib. Cərrahi əməliyyat ehtimalını istisna etməyib", deyə Məmmədlinin qardaşı Nəsimi Məmmədli bildirib.

Nəsimi Məmmədli deyib ki, telefon danışığı zamanı Ələsgər Məmmədlinin səsi yenə də zəif və yorğun gəlib.

"Boğazındakı şiş onun yatmasına əngəl yaradır və yuxususzluqdan əziyyət çəkir. İsti hava, qapalı şərait, boğulma halı və davamlı baş ağrısı onun səhhətində getdikcə ağır fəsadlar yaradır", deyə o qeyd edib.

Penitensiar Xidmət Məmmədlinin səhhəti ilə bağlı sorğusuna hələ cavab verməyib.

Martın 6-8-də Tolum TV və onun tərəfdaş təşkilatı Demokratik Təşəbbüslər İnstitutunun 9 əməkdaşı saxlanılıb. Onlar xarici valyuta qaçaqmalçılığında ittiham olunurlar. Yeddi nəfər barədə həbs qətimkan tədbiri seçilib, iki nəfər isə polisin nəzarətinə verilib.

Toplum TV-nin təsisçisi Ələsgər Məmmədli də valyuta qaçaqmalçılığında ittiham olunur.