Emil Səlimov mənzilində axtarışdan sonra buraxılıb (yenilənib)

Bakı/12.01.21/Turan: Yanvarın 12-də axşam AXCP Gənclər Komitəsinin rəhbəri Emil Səlimov hüquq-mühafizə orqanları tərəfindən buraxılıb. Bu barədə Turan-a E.Səlimov özü bildirib.

E.Səlimovun sözlərinə görə, yanvarın 12–də o, Baş Prokurorluğun İstintaq İdarəsində AXCP sədri Əli Kərimlinin ictimai əsaslarla mühafizəçisi Niyaməddin Əhmədovun işi üzrə şahid qismində 4 saat ərzində dindirilib.

“Saat 20.00-ə qədər dindirildim, ifadəmi aldılar. Sonra mənim mənzilimdə qanunsuz bir obyektin saxlama ehtimalına əsasən axtarış aparıldı. Təbii ki, heç bir şey tapmadılar və məni buraxdılar. Amma mənə xəbərdarlıq etdilər ki, mobil telefon həmişə açıq olsun, çünki yenidən zəng edə bilərlər", - E.Səlimov qeyd edib.

Bununla yanaşı, o qeyd edib ki, istintaq zamanı ona təzyiq göstərilməyib.

Baş Prokurorluqdan şərh almaq mümkün olmayıb.-0-

*   *   *

2021 Yanvar 12 (Çərşənbə axşamı) 22:46:47

Prokurorluq AXCP fəalının evində baxış keçirir

Bakı/12.01.21/Turan: Azərbaycan Xalq Cəbhəsi Partiyasının Gənclər Komitəsinin sədri Emil Səlimovun evində Baş Prokurorluğun İstintaq İdarəsinin əməkdaşları tərəfindən baxış keçirildiyi deyilir.

Bu barədə Turana AXCP-dən məlumat verilib.

Məlumata görə, E.Səlimov bu gün, yanvarın 12-də Baş Prokurorluğun İstintaq İdarəsinə çağırılıb. "Emil bəyi həbsdə olan Əli Kərimlinin ictimai əsaslarla mühafizəçisi Niyaməddin Əhmədovun işi ilə bağlı şahid qismində çağırıblar. Saat 16:00-da Prokurorluğa girən Emil Səlimov saat 20:10-da ağ rəngli avtomobillə binadan çıxdı və qurumun binasının önündə olan parriya yoldaşlarına bildirdi ki, gedirlər evə baxış keçirməyə".

Məsələ ilə bağlı Baş Prokurorluqdan münasibət öyrənmək mümkün olmayıb.

Niyaməddin Əhmədov CM-in 214-1 (terroru maliyyələşdirmə) maddəsi ilə ittiham olunur. O, Almaniyada sığınacaq almış, sosial şəbəkələrdə Azərbaycan hakimiyyətini tənqid, hətta bir sıra hallarda təhqir edən Qabil Məmmədovla əlaqədə ittiham olunur. Prokurorluq iddia edir ki, Q.Məmmədov Azərbaycanda terror törətmək istəyib, bu məqsədlə N.Əhmədova pul göndərib.

CM-in 214-1 maddəsində 10 ildən 14 ilə qədər həbs cəzası nəzərdə tutulub.

AXCP də bu ittihamın absurd olduğunu bəyan edib, N.Əhmədovun həbsini isə partiyaya və Ə.Kərimliyə qarşı repressiyaların davamı kimi qiymətləndirib.—21D-