Ərdoğan: “Ermənistanın Azərbaycana münasibətinin nəticələri olacaq”

Bakı/14.09.22/Turan: Çərşənbə günü Türkiyə prezidenti Rəcəb Tayyib Ərdoğan bildirib ki, Ermənistanın Azərbaycana münasibəti qəbuledilməzdir və iki qonşu arasında bir neçə gün davam edən toqquşmalardan sonra bunun nəticələri olacaq.

“Biz Ermənistanın Azərbaycanın qələbəsilə nəticələnən müharibədən sonra (2020-ci il) əldə edilmiş razılaşmanı pozması nəticəsində yaranmış vəziyyəti qəbuledilməz hesab edirik”, - Ərdoğan Türkiyənin paytaxtı Ankarada mitinq zamanı bildirib.

Dağlıq Qarabağ anklavına görə on illərlə düşmənçilik edən Ermənistan və Azərbaycan bazar ertəsi gec saatlarda baş vermiş sərhəd toqquşmalarında bir-birini ittiham edir.

“Ümid edirik ki, tezliklə Ermənistan bu yanlış yoldan dönəcək, öz vaxtını və enerjisini sülhün möhkəmlənməsinə sərf edəcək”, - Ərdoğan əlavə edib.

“Əlbəttə ki, belə münasibət, nəinki imzalanmış sazişin şərtlərini yerinə yetirməyən, həm də daim aqressiv əhval-ruhiyyə sərgiləyən erməni tərəfi üçün nəticələrə səbəb olacaq”.

Cənubi Qafqazda, Avropa, Asiya və Yaxın Şərqin kəsişməsində münaqişə Rusiya və Türkiyə kimi böyük dövlətləri özünə cəlb edə bilər və Xəzər neft-qazını Qərbə nəql edən boru kəmərlərini təhlükə altına sala bilər.

Çərşənbə günü türkiyəli yüksək vəzifəli  məmur bildirib ki, Ərdoğan və Rusiya prezidenti Vladimir Putin bu həftənin sonunda Özbəkistanın Səmərqənd şəhərində  görüş zamanı son hərbi əməliyyatları müzakirə edəcəklər.-0-