Ərdoğan türk ölkələrini qarşılıqlı ticarət, investisiya və nəqliyyat əlaqələrini aktivləşdirməyə çağırıb

İstanbul/12.11.21/Turan: Türkiyə prezidenti Rəcəb Tayyib Ərdoğan türkdilli dövlətlər arasında əməkdaşlıq üçün maneələrin aradan qaldırılmasına çağırıb.

Türkiyə lideri bunu cümə günü İstanbulda Türk Şurası liderlərinin səkkizinci sammitinin açılışında çıxışı zamanı deyib.

Ərdoğan təşkilata üzv ölkələr arasında ticarətin səviyyəsini qeyri-kafi adlandırıb.

“Ölkələrimiz arasında ticarət dövriyyəsi 21 milyard dollara çatır, bu da dünyanın digər ölkələri ilə ticarət dövriyyəsinin cəmi 3%-ni təşkil edir. Türk Şurası ölkələri nəqliyyat əlaqələrini, o cümlədən Transxəzər dəhlizi boyunca inkişaf etdirməlidir. Naxçıvandan (Azərbaycan) keçən marşrut da vacibdir”, - deyə o bildirib.

Türkiyə prezidenti həmçinin terrorizmin təzahürlərinə qarşı, o cümlədən PKK-YPG yaraqlıları, İŞİD və Fətullah Gülən təşkilatı ilə fəal mübarizə və həmrəyliyin vacibliyini qeyd edib.

Türkdilli ölkələr “İqtisadiyyatın yaşıl inkişafı” ekoloji konsepsiyası çərçivəsində birgə layihələr həyata keçirməlidir.

Ərdoğan liderlərə təbii fəlakətlərin nəticələrinin aradan qaldırılmasına kömək edəcək Türk Şurasının vahid Mülki Müdafiə Mexanizmini formalaşdırmağı təklif edib. 

O, Türk Şurası ölkələrini “türk dünyasının ayrılmaz hissəsi olan” Şimali Kiprin blokadasının aradan qaldırılmasında iştirak etməyə çağırıb və Şimali Kipr Türk Respublikasının Türk Şurasına qəbul olunmasına ümid etdiyini bildirib.

Türk Şurası ölkələri "müasir dövrün bəlası"na - ksenofobiyanın və islamofobiyanın dağıdıcı nəticələrinə qarşı birgə mübarizə aparmalıdır, Türkiyə lideri qeyd edib. -02B-