Ermənistan Naxçıvana yolun açılmasını hərbi əsirlərin azad edilməsi ilə əlaqələndirir

Bakı/28.01.21/Turan: Rusiya, Azərbaycan və Ermənistan baş nazir müavinlərinin Moskva görüşü yanvarın 30-da keçiriləcək. Görüşdə kommunikasiyaların açılması məsələsi müzakirə olunacaq. Bu barədə cümə axşamı Ermənistan baş nazirinin müavini Mqer Qriqoryan bildirib. Onun sözlərinə görə, üç liderin 11 yanvar tarixli birgə bəyanatının müzakirə edilməsi planlaşdırılır.

Qriqoryan kommunikasiyaların açılmasını həddindən artıq mürəkkəb iş sayır, çünki “əlavə müzakirə, təhlil və konkretləşdirilmə tələb edən çox sayda məsələ qalır”. Ermənistan üçün Azərbaycan ərazisindən keçən nəqliyyat dəhlizi ilə bağlı məsələlərin həlli üçün çox sayda komponent, o cümlədən təhlükəsizlik məsələsi var. Bütün bu komponentlər təhlil edilməlidir, deyə o bildirib.

Dünən Ermənistanın XİN başçısı Ayvazyan, daha sonra baş nazir Paşinyan da Fransanın dövlət naziri Lömuanla görüşdə erməni hərbi əsirlər azad edilmədən regionda kommunikasiyaların bərpa edilməsinin qeyri-mümkün olduğunu bildiriblər. Ermənistan tərəfin məlumatına görə, Azərbaycanda 64 nəfərdən 235 nəfərə qədər əsir var. Onların böyük hissəsi 10 noyabr 2020-ci il bəyanatından sonra əsir düşüb. Bu, o deməkdir ki, onlar bütün erməni qoşunlarının regiondan çıxarılması haqqında razılaşmaya zidd olaraq Azərbaycana göndərilən hərbiçilərdir. -02D-