Ermənistan parlamentinin deputatı: “Rusiya hər gün Ermənistan ordusuna silah-sursat göndərir”

Bakı/21.1020/Turan: Ermənistan parlamentinin İnsan hüquqları komissiyasının sədri Naira Zöhrabyan Yerevanda “TV24” efirində çıxışı zamanı qalmaqallı bəyanat verib.

“Rusiya hərbi sursat hissəsi üzrə öz strateji müttəfiq öhdəliklərini yerinə yetirib və yerinə yetirməkdə davam edir. Buna şübhə edənlər ən azı axmaqdır. Ya da xain. Rusiya öz öhdəliklərini gündəlik rejimdə yerinə yetirməkdə davam edir. Mən mötərizəni aça bilmərəm, amma deyə bilərəm ki, Ermənistanda ardıcıl olaraq antirusiya əhval–ruhiyyəsini yayan qrant yeyən təşkilatlar çox pis hərəkət etdilər. Bununla belə, Rusiya həm müqavilələr, həm də “qeyri-müqavilələr” çərçivəsində öz öhdəliklərini yerinə yetirməkdə davam edir”, - o, 2020-ci il oktyabrın 21-də deyib.

Bununla da N. Zöhrabyan Rusiyanın Azərbaycan ərazisində döyüşən erməni ordusu üçün gündəlik silah-sursat göndərməsi barədə məxfi məlumat verib.

Deputat Qarabağ müharibəsində erməni ordusunun gündəlik məğlubiyyətindən isterikaya düşərək sirri açıb. Zöhrabyan həmin çıxışında etika çərçivəsini aşıb:

“Əgər bu, təkcə Azərbaycanla müharibə olsaydı, əminəm ki, bizim hərbçilərimiz onları tum kimi çırtlardılar. Amma Ermənistan və Arsax bu gün NATO-nun ən güclü ordularından biri ilə, həm də təkcə Türkiyə ordusu ilə deyil, beynəlxalq terrorizmlə də savaşır. Ermənistan və Arsaxın resursları, sadəcə, müqayisəolunmazdır”.

O, beynəlxalq birliyi baş verənlərə kor və kar olnaqda ittiham edib: “Mən indi deyirəm: beynəlxalq birlik, Avropa İttifaqı, BMT, sizin hamınıza tüpürürəm, siz cinayətə şəriksiniz, siz cinayətkarsınız. Sizin hamınızın və ayrılıqda hər biriniz üçün şəxsi, iqtisadi, siyasi maraqlar prioritetdir. Sizin dediklərinizin hamısı insan hüquqları, uşaq hüquqları, xalqın hüquqları sırf demaqoqiyadır. Siz hamınız demaqoqsunuz. Bundan sonra mən beynəlxalq birliyi ölü qurum hesab edirəm”. Onun sözlərinə görə, vaxt gələcək, Ermənistan həmin beynəlxalq təşkilatlara üzvlüyün vacib olub-olmadığını müzakirə edəcək. –0—