Ermənistan Qarabağ müharibəsini nəzərə alaraq ordunu yenidən silahlandırır

Bakı/23.02.21/Turan: Qarabağda döyüş əməliyyatlarından sonra Ermənistan orduda islahat aparır, ordunun say tərkibini optimallaşdırır, yeni silah və hərbi texnika sistemlərinə keçir. Bu barədə ölkənin müdafiə naziri Vaqarşak Arutyunyan RİA-ya müsahibəsində bildirib.

"Bu prosesə bilavasitə rusiyalı həmkarlarımız da cəlb olunublar", - Arutyunyan deyib.

"Qarabağda baş verən döyüş təcrübəsini və məlum hadisələri nəzərə alaraq, döyüş komponentinin artırılması vasitəsilə hərbi və say tərkibi məsələsinin optimallaşdırılması, prioritet istiqamətlər üzrə yeni silah kompleksi və sistemlərilə yenidən silahlanma, kadr potensialının saxlanması, zabitlərin, dövlət qulluqçularının və hərbi qulluqçuların müqavilə üzrə komplektləşmə səviyyəsinin artırılması məsələlərinə kardinal şəkildə yenidən baxacağıq", - Arutyunyan qeyd edib.

Əsas səylər idarəetmə, kəşfiyyat, radioelektron mübarizə, HHM və pilotsuz aviasiya, raket qoşunları və artilleriya sistemlərinin inkişafına yönəldiləcək.

Yanvarın 25-30-da RF Müdafiə Nazirliyinin nümayəndə heyəti Ermənistan SQ-nin islahatı və modernləşdirilməsi məsələlərinə yardım göstərilməsi məqsədilə Ermənistanda olub.

"Birgə işin yekunlarına görə, Ermənistan Silahlı Qüvvələrinin modernləşdirilməsi çərçivəsində gələcək fəaliyyət və tədbirlərə dair tövsiyələr hazırlanıb, hərbi-texniki tərəfə ciddi diqqət yönəldilib", - nazir qeyd edib.

Ermənistanda Rusiyanın ikinci hərbi bazasının yerləşdirilməsi ideyasını şərh edən nazir deyib ki, buna ehtiyac yoxdur. Eyni zamanda, Yerevan və Moskva Rusiyanın 102-ci hərbi bazasının müəyyən hərbi birləşməsinin Ermənistanın şərqində yerləşməsinin mümkünlüyünə dair məsələnin üzərində işləyirlər, o qeyd edib.

"Yəqin ki, Rusiyanın hərbi bazasının tərkibindən (onun genişlənməsini nəzərə alaraq) hər hansı hərbi birləşmənin Ermənistanın şərq istiqamətinə köçürülməsinin mümkünlüyündən danışmaq daha doğru olardı və bu kontekstdə məsələnin üzərində müvafiq birgə iş aparılır",-nazir deyib.

Bundan əlavə, onun sözlərinə görə, Ermənistanda olan Rusiya sərhədçilərə əlavə funksiyalar həvalə edilib. "Həqiqətən Rusiya sərhədçilərinin üzərinə Ermənistan Respublikasının Azərbaycan ilə sərhəddinin qorunmasının və təhlükəsizliyinin təmin edilməsi üzrə əlavə funksiyalar qoyulub.

1995-ci il tarixli dövlətlərarası müqaviləyə əsasən Ermənistanın Gümrüdə Şirak vilayətində Rusiyanın hərbi bazası yerləşir. 2010-cu ildə sənədə dəyişiklik edilib və buna uyğun olaraq onun qalma müddəti əvvəlki 25 ildən 49 ilədək, 2044-cü ilə qədər uzadılıb.-02D-