Ermənistan qoşunlarının Azərbaycan ərazilərində olması sülh üçün ciddi təhlükədir - C.Bayramov

Bakı/31.07.23/Turan: Münaqişədən sonrakı dövrdə Azərbaycan və Türkiyənin mövqeyi beynəlxalq norma və prinsiplərə əsaslanır. Bunu Azərbaycanın xarici işlər naziri Ceyhun Bayramov bu gün Ankarada türkiyəli həmkarı Hakan Fidanla danışıqların yekunu üzrə keçirdiyi birgə mətbuat konfransında deyib.

Bayramov vurğulayıb ki, Azərbaycanın Ermənistana təklif etdiyi, qarşılıqlı əsasda ölkələrin suverenliyinə və sərhədlərinin toxunulmazlığına hörmət prinsipinə əsaslanan sülh sazişinin imzalanması vacibdir.

Lakin Ermənistanın Azərbaycan ərazilərində öz silahlı birləşmələrini qoruyub saxlaması, İrəvanın Zəngəzur dəhlizinin açılmasına mane olması, Qarabağda yaşayan ermənilərin “hüquqlarını qorumaq” adı ilə Azərbaycanın daxili işlərinə qarışması, habelə onların Azərbaycan dövlətinə və cəmiyyətinə reinteqrasiyasına maneələr yaratması regionda sülh və əmin-amanlığa ciddi təhdid olaraq qalır, deyə o fikrini davam etdirib.

V.Bayramov onu da qeyd edib ki, 44 günlük Vətən Müharibəsi Azərbaycan-Türkiyə həmrəylik və qardaşlıq münasibətlərinin dünyada analoqu olmayan səviyyədə bariz nümunəsinə çevrilib.
O, türkiyəli həmkarı ilə bir sıra beynəlxalq platformalarda əməkdaşlığı müzakirə etdiyini bildirib.

Bu kontekstdə o bildirib ki, Azərbaycan-Türkiyə-İsrail platforması ölkələr arasında əlaqələrin daha geniş coğrafiyası baxımından əhəmiyyətli ola bilər. 

Bayramov onu da bildirib ki, İğdır-Naxçıvan qaz kəmərinin tikintisi 2024-cü ildə başa çatacaq.

Ümumilikdə, Bayramovun qeyd etdiyi kimi, enerji sektoru Azərbaycan və Türkiyə arasında mövcud əlaqələrin uğurlu sahələrindən biridir. O vurğulayıb ki, yaxın gələcəkdə Azərbaycan təbii qazının Türkiyə və Şərqi Avropa bazarlarına nəqlinin həcmində artım olacaq. 06B