Ermənistanın xülyası gerçəkləşmədi, general Bərxudarov hücumçu qüvvələrə komandirlik edir

Bakı/28.09.20/Turan: Ermənistan KİV-ləri bu gün saxta saytlara istinadla Azərbaycanlı general Mayis Bərxudarovun əsir götürüldüyü haqqında "sensasiya doğuran xəbər" yayıb.

Ermənistanın bu xülyası o qədər böyüyüb ki, Müdafiə Nazirliyinin rəsmi nümayəndəsi Artsrun Ovanessyan brifinqdə bu məlumatı təkzib edib.

Öz növbəsində, Azərbaycan Müdafiə Nazirliyi generalın bəyanatını dərc edib.

"Düşmən hücumunun qarşısının alınması məqsədilə həyata keçirdiyimiz əks-hücum əməliyyatı uğurla davam edir. Gərgin döyüşlər gedir. Ordumuz torpaqlarımızın işğaldan azad edilməsi üzrə tapşırıqları yüksək döyüş əzmi və igidliklə icra edir.

Komandirlik etdiyim birliyin şəxsi heyəti düşməni tam məhv etmək üçün son damla qanınadək vuruşacaq və qələbə qazanacaq", deyə general qeyd edib

Xatırladaq ki, Mayis Bərxudarova 2016-cı ilin aprelində Füzuli rayonunda strateji Lələ təpə yüksəkliyini azad edilməsində göstərdiyi şücaətə görə general rütbəsi verilib. -02D-