Fazil Qasımov 53 gündür aclıq edir

53-cü gündür aclıq edən iqtisadçı Fazil Qasımovun vəziyyəti pisləşməyə davam edir.

Penitensiar Xidmətin müalicə müəssisəsində saxlanılan Qasımov “ədalətsiz həbsinə” etiraz edir. O aclığı sonadək davam etdirmək əzmində olduğunu bildirib. Bu barədə Turan-a onun qardaşı Nazim Qasımov avqustun 5-də Fazil Qasımov ilə telefon danışığından sonra bildirib.

“Qardaşımın demək olar ki, səsi çıxmır, artıq xırıldaya-xırıldaya danışır. Ümumi durumu çox ağıdırdr. Müalicə müəssisəsində ayrıca otaqda saxlanılır, nəzarət var. Amma həkim hər gün onun arterial qan təzyiqini, nəbzini, nədən hərarətini və çəkisini ölçmür.  Həkim yalnız Fazil dəvət edəndə onu müayinə edir. Sonuncu dəfə  çəkisi 49 kiloqram olub. Aclıqdan əvvəl 67 kiloqram idi.  Fazil başında, böyrəsində kəskin ağrıların olduğunu, ürəyində sancmalardan əziyyət çəkdiyini deyib. Ayaqlarında da ağrılar baş qaldırıb”, - Nazim Qasımov deyib.

Ötən həftəsən Fazil Qasımov içdiyi suya bal qataraq qəbul edir. Cəzaçəkmə yerlərində aclıq edən şəxslərlə bağlı Ədliyyə Nazirliyinin təlimatında buna yol verilir.

Penitensiar Xidmətdən şərh almaq mümkün olmayıb.

* Fazil Qasımov 7 avqust 2023-cü ildə Türkiyədə saxlanılıb və Azərbaycana gətirilib. O,  Cinayət Məcəlləsinin 204.3.1-ci (mütəşəkkil qrupun tərkibində saxta pulların hazırlanması, alınması və ya satışı) maddəsilə ittiham olunub.

İstintaq bildirir ki, o, saxta pulları sonradan həbs olunmuş müxalifətçi siyasətçi Qubad İbadoğluna verib.

Bu yaxınlarda Qasımov baş prokuror, ombudsman, yerli və beynəlxalq ictimaiyyətə müraciətində bildirib ki, bu ifadələri işgəncə altında verib. O,  ifadələrdən imtina edərək İbadoğluna saxta pul vermədiyini, onunla heç vaxt FETO (Türkiyədə terror təşkilatı kimi tanınan Fətullah Gülən hərəkatı) mövzularında müzakirələr aparmadığını bildirib.

Fazil Qasımov əsassız cinayət təqibinə və istintaqın əvvəlində məruz qaldığı işgəncələrə etiraz olaraq iyunun 14-dən aclıq edir.