Feministlərin aksiyasında saxlanılanlar sərbəst buraxılıb (YENİLƏNİB)

Feministlərin aksiyasında saxlanılanlar sərbəst buraxılıb.

Onların bir hissəsi  Qış Parkında  yenidən aksiya keçirməyə cəhd edib.

Fəallar "Şiddətə susma, şiddətə dözmə" şüarları səsləndirib, plakatları qaldırıblar.

Ərazidə olan polis əməkdaşları aksiyaçıların əlindən plakatları alıb cırıblar.

Daha sonda fəallar bəyanat oxuyub. Bəyanatda ölkədə baş verən qadın qətlləri siyasi adlandırılıb, ölkədə gender bərabərliyin olmaması qeyd olunub.

Polis aksiya iştirakçılarını ərazidən uzaqlaşdırılıb. 

2021 Mart 08 (Bazar ertəsi) 18:08:12*   *   *

Polis feministlərin aksiyasını dağıdıb

Bakı/08.03.21/Turan: Şəhərin mərkəzində bir qrup fəal "8 Marş - Haqlarımız Uğrunda" adlı aksiyanı keçirməyə cəhd edib.

Feminist fəallar aksiyanı Azərbaycanda qadın hüquqların pozulması səbəbindən keçirdiyini bildirib.

Məlumata görə, aksiyadan əvvəl mülki geyimli şəxslər aksiya yerinə yaxın olan kafeyə girərək bir neçə fəalı saxlayıb. Onların arasında Aytac Ağazadə, Sevgi İsmayılbəyli, Zəhra Kələndərova və Vəfa Nağı olub. Onlar naməlum istiqamətə aparılıb. 

Aksiya başlayan andan əraziyə cəlb olunmuş polis qüvvələri iştirakçıların əlindən plakatları alaraq özlərini saxlamağa başladı. Aksiya iştirakçıları polis maşınlarına mindirilərək aparıldı. 

Aksiya zamanı 10-dan artıq fəal saxlanıldığı bildirilir. 

Aksiyada "Qadın kimi savaş, qadın kimi dağıt, qadın kimi yarat" şüarlar səsləndirilib.

Daxili İşlər Nazirliyinin Mətbuat xidmətinin KİV və İctimaiyyətlə əlaqələr şöbəsinin rəisi Elşad Hacıyev Turana bildirib ki, qanunsuz aksiyanın cəhdi polis tərəfindən alınıb. "Bu barədə əvvəlcədən Daxili İşlər Nazirliyi tərəfindən müvafiq xəbərdarlıq edilmişdi və xəbərlərdə vurğulanırdı ki, razılaşdırılmamış aksiyanın qarşısı alınacaq. Bu tələblərə əməl etməyən şəxslər ərazidən uzaqlaşdırılıb".

E.Hacıyev əlavə edib ki, saxlanılan yoxdur, məsələ ilə bağlı əlavə məlumat veriləcək. –21D