Gəncə hərbi aeroportunun məhv edilməsi yalandır. Hikmət Hacıyev: “Bakı adekvat cavab verəcək” (VIDEO-YENİLƏNİB)

Bakı/04.10.20/Turan: Gəncə yaxınlığında hərbi aeroportun məhv edilməsi barədə ermənilərin iddiaları yalandır. “Smerç” sistemindən raketlər şəhərə düşüb, onların bir qismi partlamayıb, bəziləri isə havada yaxalanaraq məhv edilib. Bu barədə Turan-a yerli sakinlər bildiriblər.

Dövlət başçısının köməkçisi Hikmət Hacıyev isə bazar günü keçirilən brifinqdə deyib ki, Azərbaycan bu hərbi cinayətə adekvat cavab verəcək.

“Azərbaycanın yaşayış məntəqələrinin atəşə tutulduğu legitim hərbi obyektlər məhv ediləcək.

 Düşmən Azərbaycanı Ermənistan ərazisindən atəşə tutmaqla üçüncü ölkələri münaqişəyə cəlb etmək məqsədi güdür, lakin bu, onlara qismət olmayacaq”, - o qeyd edib.

H.Hacıyev deyib ki, Qarabağ erməniləri öz liderləri Araik Arutyunyanın yaralanması faktını ört-basdır etməyə çalışırlar. “O, bunkerdə olarkən yaralanıb”, -H. Hacıyev bildirib.-02В-

*   *   *

2020 Oktyab 04 (Bazar) 14:18:38

Gəncə atəşə tutulub - VIDEO

Bakı/04.10.20/Turan: Oktyabrın 4-də səhər erməni tərəfi Azərbaycanın ikinci mühüm şəhəri Gəncəni atəşə tutub. Bu barədə Azərbaycan Müdafiə Nazirliyinin mətbuat xidməti məlumat yayıb.

Atəşin hansı silahlardan açılması və nəticələri barədə məlumat verilmir.

Eyni zamanda Azərbaycan Silahlı Qüvvələrinin Füzuli rayonundakı mövqeləri Ermənistan ərazisindən raket atəşinə tutulur.

Qarabağ ərazisindən Ağdam və Tərtər rayonlarının yaşayış məntəqələri artilleriya atəşinə tutulur.-0-