Gəncəyə “Toçka-U” deyil, “Skad” raketi atılıb

Bakı/12.10.20/Turan: Gəncə şəhərinin yaşayış binasına raket zərbəsi ballistik “Skad” (Scud) raketi ilə endirilib, bu barədə Ərazilərin Minalardan Təmizlənməsi üzrə Milli Agentliyin icraçı direktoru Qəzənfər Əhmədov bildirib.

“Gəncənin sıx yaşayış məntəqəsilə atılan raketin bütün parçalarını toplayıb tədqiq etdikdən sonra belə bir nəticəyə gəldik ki, əvvəlcə “Toçka U” raketi zənn etsək də, bu, “Skad” raketidir”, deyə Əhmədov Gəncədə xarici diplomatlar üçün keçirilən brifinqdə bildirib.

Onun sözlərinə görə, raketin parçalarının üzərində 8K14 yazısı aşkar edilib, bu da onun növünü müəyyən etməyə imkan verir. Raketin uçuşməsafəsi 300 kilometrdir, deyə Əhmədov qeyd edib.

Öz növbəsində, Azərbaycan prezidentinin köməkçisi Hikmət Hacıyev böyük şəhərin dinc əhalisinə atəş açmaq üçün ballistik raketdən istifadəni “vandalizm və müharibə cinayəti” adlandırıb.

Xatırladaq ki, oktyabrın 11-nə keçən gecə Gəncəyə endirilən raket zərbəsi nəticəsində 9 nəfər, o cümlədən dörd qadın həlak olub. 34 nəfər yaralanıb, 5 mərtəbəli yaşayış binası tamamilə dağılıb, ətrafdakı onlarla evə isə ciddi ziyan dəyib. -02D-