General Konaşenkovun xətrinə dəyməyin və ya Şuşada “İsgəndər” raketlərinin qalıqları

Bakı/31.03.21/Turan: Azərbaycan Ərazilərinin Minalardan təmizlənməsi üzrə Agentlik – ANAMA bu gün Şuşada iki ədəd “İsgəndər” raketinin qalıqlarının aşkar edildiyi barədə məlumat sızdırıb. Amma bu məlumat pis detektiv və ya casus filmi üslubunda verilib.

Belə ki, Bakı saytlarından biri martın 31-də agentliyin adı açıqlanmayan nümayəndəsi ilə “müsahibə” dərc edib. Ermənilərin İkinci Qarabağ Müharibəsi zamanı “İsgəndər” raketlərindən istifadə edib-etməməsi barədə suala cavabda agentliyin əməkdaşı deyir ki, bu cür bəyanatları şərh edə bilməz. Amma elə həmin nümayəndə buradaca əlavə edir ki, 2020-ci ilin dekabrından etibarən agentlik Şuşada işləyir, burada martın 2-də iki raketin qalıqları tapılıb, üzərindəki nömrələr bu raketlərin “İsgəndər” olduğunu təsdiq edir.

Elə həmin saytda üzərində seriya nömrələri yazılan raket hissələrinin fotoşəkilləri dərc edilib.

Turan informasiya agentliyi nəşri təsdiq etmək xahişi ilə Azərbaycan Ərazilərinin Minalardan təmizlənməsi üzrə Agentliyə müraciət edib. Amma agentliyin mətbuat xidmətindən bildiriblər ki, bu məsələ ilə bağlı heç nə deyə bilməzlər. Agentliyin bu nəşri təkzib edib-etməməsi haqqında suala cavabda yenə də şərh verə bilməyəcəklərini deyiblər.

Bu “casusluq oyunlarının” Rusiya Müdafiə Nazirliyinin xətrinə dəyməmək üçün təşkil edildiyini təxmin etmək olar. Bu Nazirliyin nümayəndəsi baş nazir Nikol Paşinyanın Azərbaycana qarşı “İsgəndər” raketlərindən istifadə olunduğu, amma onların cəmi 10% partladığı haqqında bəyanatını təkzib edib.

Belə ki, Rusiya Federasiyası Müdafiə Nazirliyinin rəsmi nümayəndəsi İqor Konaşenkov bildirib ki, İkinci Qarabağ Müharibəsi zamanı Ermənistan bir “İsgəndər” raketindən belə istifadə etməyib. Bütün döyüş sursatları anbarlardadır. -02D-