Gürcüstanda Azərbaycana xidmət etməkdə ittiham olunan xəritəşünasların işi üzrə məhkəmə bərpa olunub

Bakı/14.06.22/Turan: Tbilisi şəhər məhkəməsində "xəritəşünasların işi" üzrə məhkəmə prosesi bərpa olunub.

Azərbaycan-Gürcüstan sərhədinin delimitasiyasında iştirak edən gürcüstanlı xəritəşünaslar İveri Melaşvili və Natalya İlyiçova "Keşikçi Dağ" ("David Qareci") kilsəsinin yerləşdiyi ərazinin sərhədini müəyyən edərkən yanlış miqyaslı xəritələrdən istifadə etməkdə ittiham olunurlar.

2020-ci ilin oktyabrında dövlət ekspertizası təqsirləndirilən şəxslərin 1970-80-ci illərdə dərc edilmiş, "(Gürcüstanın) tarixi maraqlarına, o cümlədən David Qareci ilə bağlı maraqlarına zidd olan" xəritələri və onlarda əksini tapan sərhədləri əsas olaraq götürdüklərini müəyyən edib".  

Sərhədin 2007-ci ilə qədərki demarkasiya zamanı razılaşdırılmış hissələri 1937-1938-ci illərdə dərc edilmiş xəritəyə uyğun deyil. Ərazinin sahəsindəki fərq Gürcüstanın zərərinə 3,5 min hektar təşkil edib, deyə Gürcüstan Baş Prokurorluğu bildirib.

Təqsirləndirilən xəritəşünaslar Melaşvili və İlyiçova 2020-ci ildə saxlanılıblar, 2021-ci ildə girov müqabilində sərbəst buraxılıblar. Təqsirləndirilən şəxlər təqsirlərini etiraf etmirlər. Melaşvili cinayət işini cəfəngiyyat və siyasi motivli iş adlandırıb.

İyunun 13-də üç şahid dinlənilib. Prokurorluq Gürcüstanın üçüncü prezidenti Mixail Saakaşvilinin işdə iştirakını istisna etməyərək, onu dindirmək qərarına gəlib.

İyunun 13-də, yarım il ərzində ilk dəfə olaraq proses üç şahidin dindirilməsi ilə davam edib. İki şahid təqsirləndirilən şəxslərin tabeliyində olan şəxslər, üçüncü şahid - Zurab Qumbaridze Gürcüstanın Azərbaycandakı səfiri olub. Vəkil Eduard Marikaşvilinin verdiyi məlumata görə, bu şəxslərin ifadələri ittiahmı təsdiq etməyib. Səfir Qumbaridze məhkəmədə xəritələrin tərtib edilməsi işində iştirak etmədiyini bildirib.

Azərbaycanda "Keşikçi Dağ" kilsəsinin yerləşdiyi ərazi Azərbaycan xalqının tarixi mülkiyyəti elan edilib, kilsə isə, Bakıdakı tarixçilərin versiyasına görə, Qafqaz Albaniyası dövlətinin zamanında tikilib. -0-