Gürcüstanın yeni baş naziri Bakıda David-Qareci monastrı məsələsini müzakirə etməyi planlaşdırır

Bakı/22.02.21/Turan: Gürcüstanın baş naziri postuna namizəd İrakli Qaribaşvili bazar ertəsi parlamentdə bildirib ki, Azərbaycana səfər onun üçün ilk xarici səfərlərdən biri olacaq.

O, Azərbaycan prezidenti İlham Əliyevlə sərhəddin delimitasiyası-demarkasiyası məsələsini və David-Qareci monastr kompleksi mövzusunu müzakirə etməyi planlaşdırır.

Qaribaşvili deyib ki, Azərbaycan Gürcüstanın yaxın və strateji dostudur, ölkəyə isə "müdrik başçı, cənab Əliyev" rəhbərlik edir və onunla "çox yaxşı münasibətləri" var.

"Bizim Azərbaycanla, qardaş dövlət ilə dialoqumuz olacaq. İnanıram ki, cənab Əliyev və dost Azərbaycan tərəfi ağıllı qərarlar qəbul edəcək, biz danışıqlar aparıb ümumi dil tapa biləcəyik", - o deyib.

Qaribaşvili Gürcüstanın keçmiş prezidenti Mixail Saakaşvilini xəyanətdə ittiham edib və əlavə edib ki, o, ölkəyə zərər vurmuş qərarlar qəbul edib.

Xatırladaq ki, Azərbaycanda Gürcüstanla sərhəddəki orta əsr monastrını Keşikçi dağ adlandırırlar və bu, xristian alban mədəniyyətinin irsi sayılır.

Gürcüstan tərəfi uzun illərdir ki, Azərbaycan ərazisində yerləşən iki monastr kompleksinin ona verilməsinə israr edir, lakin Bakı bunu mümkünsüz sayır.-02D-