Hakim partiya parlament seçkiləri üçün namizədlər siyahısının təsdiq edildiyini bildirib

Bakı/27.12.19/Turan: Dekabrın 27-də axşam hakim Yeni Azərbaycan Partiyası 9 fevral 2020-ci il parlament seçkiləri üçün öz namizədlərinin siyahısını təsdiq etdiyini bildirib.

Bu barədə məlumat saat 17:41-də partiyanın saytında yerləşdirilib.

Siyahı hələlik dərc edilməyib. Qeyri-rəsmi məlumatlara görə, siyahı partiyanın İdarə Heyətinin iclasında bir neçə saat davam edən müzakirələrdən sonra təsdiq edilib.

Müzakirələrin yekunlarını şərh edən partiyanın icra katibinin müavini Siyavuş Novruzov jurnalistlərə bildirib ki, 123 dairədən namizədlər irəli sürülüb. Naxçıvanda 3 saylı seçki dairəsindən və Xankəndi (Dağlıq Qarabağ) seçki dairəsindən namizəd irəli sürülməyəcək.

Onun sözlərinə görə, hakim partiyadan parlament fraksiyası xeyli yenilənəcək, bu gün təsdiq edilmiş siyahıda qadınların və gənclərin sayı daha çoxdur.

O, həmçinin qeyd edib ki, Yeni Azərbaycan Partiyası üzvlərindən kimsə partiyanın qərarından kənar öz namizədliyini irəli sürəcəksə, o, partiyanın siyasətinə zidd getmiş olacaq. -02D-