Human Rights Watch Azərbaycan hakimiyyətini müxalifət fəallarını dərhal azad etməyə çağırıb

Bakı/19.08.20/Turan: 2020-ci il iyulun 14-də Bakıda keçirilən icazəsiz mitinqdən sonra Azərbaycan hakimiyyəti çox sayda müxalifət fəalını və liderini əsassız cinayət ittihamları ilə həbs edib, bu barədə Human Rights Watch-un bugünki bəyanatında deyilir.

İyulun 14-də axşam saatlarında etiraz aksiyası iştirakçılarından kiçik bir qrup qısa müddətə parlament binasına daxil olub və polis tərəfindən saxlanılana qədər əmlaka ziyan vurub. Hakimiyyət bunun siyasi müxalifətin hökuməti zorla devirmək cəhdi olduğunu bəyan edib və sonrakı günlərdə onlarla fəalı həbs edib.

“Azərbaycanda son həbs dalğası yaxşı sınaqdan çıxarılmış siyasi motivli həbslər və məhkəmə təqibləri sxeminin ardınca gəlir və ölkənin ən qədim müxalifət partiyalarından birini məhv etmək təhlükəsi daşıyır”, deyə Human Rights Watch-un Avropa və Mərkəzi Asiya üzrə direktor müavini Georgi Qogiya bildirib. “Hakimiyyət repressiyalara dərhal son qoymalı, ədalətsiz həbs edilmiş şəxsləri azad etməli və hüquq-mühafizə orqanlarının əməllərini araşdırmalıdır”,

HRW 11 hüquqşünasla söhbət edib və iyulun 15-dən etibarən saxlanılmış 10 nəfərin məhkəmə sənədləri ilə tanış olub.

Həbslər prezident İlham Əliyevin ümummilli televiziyadakı çıxışında müxalif Azərbaycan Xalq Cəbhəsi Partiyasını (AXCP) zorakılığa təhrik etməkdə ittiham etməsindən, “satqın”, “düşmən” və “beşinci kolon” adlandırmasından, “onunla işi bitirmək” zərurətini qeyd etməsindən sonra baş verib.

Hakimiyyət “ictimai asayişi pozma və ya hökumət nümayəndəsinə qarşı müqavimət və ya güc tətbiq etmə” faktı üzrə təhqiqata başlayıb. Fəallar bildirirlər ki, ən az 80 nəfər əsassız inzibati ittihamlar və cinayət ittihamları ilə saxlanılıb, cərimələrin dəqiq məbləği isə bəlli deyil.

Onlar arasında 17 AXCP üzvü var, hüquqşünasların sözlərinə görə, onların heç biri parlamentə daxil olan qrupun tərkibində olmayıb. Çoxları hətta mitinqdə də olmayıb. Bununla belə, 16 nəfər vəzifəli şəxslərə qarşı zorakılıq tətbiq etməkdə, ictimai asayişi pozmaqda və əmlakı məhv etməkdə, bir nəfər isə yoluxucu xəstəliyi yaymaqda ittiham olunur. Saxlanılanlardan beşi – Asif Yusifli, Məmməd İbrahim, Fuad Qəhrəmanlı, Bəxtiyar İmanov və Ayaz Məhərrəmli AXCP-nin Rəyasət Heyətinin üzvləridir.

Qəhrəmanlı və İbrahimə qarşı əlavə olaraq hökuməti devirməyə cəhd ittihamı irəli sürülüb. Bu əməl 20 ilə qədər azadlıqdan məhrumetmə və ya ömürlük həbs ilə cəzalandırılır.

Rəyasət Heyətinin saxlanılan dörd üzvü mitinqdə iştirak etmədiklərini bildirirlər. Məhkəmələr bir nəfərdən başqa, saxlanılan bütün partiya üzvlərini dörd aya qədər həbs edib. Onlardan biri, Elvin Məmmədov ölkəni tərk etməmək barədə iltizam alınaraq sərbəst buraxılıb.

Partiyanın həbs edilmiş üzvlərindən biri, Məhəmməd İmanlı “karantin rejimini pozduğuna” görə cinayət təqibinə məruz qoyulur, hakimiyyət əsassız olaraq onun Covid-19 virusunu yaydığını iddia edir.

Mehdi İbrahimov, AXCP-nin sədr müavini Məmməd İbrahimin oğlu da sanitariya-gigiyena qaydalarını pozmaqda ittiham edilir və polisin müsbət test nəticəsi haqqında bəyanatı əsasında ilkin həbsdədir. Mehdi İbrahim mitinqdə iştirak edib. Onun vəkilinin sözlərinə görə, növbəti gün polis onu 100-dən çox iştirakçı ilə birlikdə saxlayıb. Onların əksəriyyəti 24 saat ərzində azad edilib, amma Mehdi məşhur müxalifətçinin oğlu olduğu məlum olduqdan sonra həbsdə saxlanılıb.

İyulun 31-də Avropa Şurası Parlament Assambleyasının Azərbaycan üzrə məruzəçiləri “hökuməti tənqid edənlərin özbaşına həbs edilməsi və saxlanılması təcrübəsi” ilə bağlı “ciddi narahatlıqlarını” ifadə ediblər və hakimiyyəti “söz və toplaşmaq azadlığına, işgəncələrin qadağan edilməsi və azadlıq, təhlükəsizlik və ədalətli məhkəmə təhqiqatı hüququna tam hörməti təmin etməyə” çağırıblar.

Prezident Əliyev iyulun 15-də çıxışında qeyd edib ki, Avropa Şurası və digər beynəlxalq təşkilatların mitinqin dağıdılması ilə bağlı tənqidinə məhəl qoymayacaq. “Əliyevin bu nitqi Azərbaycanın beynəlxalq tərəfdaşlarını qorxutmamalıdır və onlar repressiyalara qarşı çıxmalıdırlar”, deyə Qogiya bildirib. “Onlar Azərbaycan hakimiyyətini  doğru addım atmağa – repressiyalara son qoymağa və ədalətsiz həbs edilmiş hər kəsi azad etməyə çağırmalıdırlar”. -0-