Hüquq müdafiəçiləri Dövlət Departamentinin nümayəndəsilə insan hüquqları ilə bağlı vəziyyəti müzakirə ediblər

Bakı/19.01.23/Turan: Bu gün ABŞ Dövlət Departamentinin Avropa və Avrasiya Məsələləri Bürosunun Qafqaz İşləri və Regional Münaqişələr İdarəsinin direktoru Mark Kameron bir qrup azərbaycanlı fəal ilə görüşüb. Bu barədə Turan-a görüşün, “Müdafiə xətti” hüquq- müdafiə təşkilatının icraçı direktoru Rüfət Səfərov bildirib.

Onun sözlərinə görə, görüş zamanı Azərbaycanda insan hüquqlarının vəziyyəti və vətəndaş cəmiyyəti fəallarını narahat edən məsələlər müzakirə olunub.

Görüşdə gender fəalı Gülnarə Mehdiyeva, ictimai fəal Ülvi Həsənli və vəkil Aqıl Layıc iştirak ediblər.

Səfərov ictimai fəal Bəxtiyar Hacıyev və müxalifətçi siyasətçi Tofiq Yaqublunun həbsinə diqqəti yönəldib.

Yanvarın 18-də Səfərov və “Müdafiə xətti”nin həmtəsisçisi Zaur Əkbər Almaniyanın Azərbaycandakı səfiri Ralf Horlemann ilə insan hüquqlarının vəziyyətini, Hacıyev və Yaqublunun işini müzakirə ediblər.

*Dekabrın 9-da Bəxtiyar Hacıyev xuliqanlıq və məhkəməyə hörmətsizlik ittihamı ilə saxlanılıb. Həmin gün Xətai Rayon Məhkəməsi onu 1 ay 20 gün həbs edib.

Dekabrın 15-də Hacıyev həbsdən azad olunması tələbilə aclıq elan edib. İctimaiyyət nümayəndələrinin və ailə üzvlərinin təkidli çağırışlarından sonra dekabrın 28-də axşam aclığı dayandırıb. Lakin Apellyasiya Məhkəməsi onun həbsilə bağlı şikayətini növbəti dəfə təmin etmədikdən sonra, yanvarın 9-da Bəxtiyar Hacıyev yenidən aclığa başlayıb və indiyədək davam etdirir.

**Dekabrın 23-də Demokratik Qüvvələrin Milli Şurasının və Müsavat Partiyasının üzvü Tofiq Yaqublu ictimai fəal Bəxtiyar Hacıyevin azadlığa buraxılması tələbilə Bakının mərkəzində keçirilən etiraz aksiyasında saxlanılıb. Həmin gün Səbail məhkəməsi onu xırda xuliqanlıq və polisə tabe olmamaq ittihamı ilə 30 sutka həbs edib. Yanvarın 5-də Bakı Apellyasiya Məhkəməsi bu qərarı qüvvədə saxlayıb. Yaqublu buna etiraz olaraq aclıq elan edib. 16В06