Hüquq müdafiəçiləri hakimiyyəti "xalq düşməni" axtarmamağa çağırıblar

Bakı/27.04.20/Turan: Azərbaycan Siyasi Məhbuslar Monitorinq Mərkəzi (ASMMM) Azərbaycan hakimiyyətini xüsusi karantin rejimindən siyasi fəallara və vətəndaş fəalalrına qarşı repressiyalar üçün istifadə etməkdə ittiham edib.

"Karantin elan edildikdən dərhal sonra Müsavat Partiyasının üzvü, keçmiş "vicdan məhbusu" Tofiq Yaqublu saxta ittihamlarla həbs edilib və hüquq müdafiəçisi və "Yüksəliş Naminə" saytının baş redaktoru Elçin Məmməd qərəzli cinayət işi əsasında həbs cəzasına məhkum edilib", deyə ASMMM sədri Elşən Həsənov bildirib.

Bundan başqa, Xalq Cəbhəsi Partiyasının 10-dan çox üzvü inzibati qaydada həbs edilib, partiyanın lideri Əli Kərimlinin isə, demək olar ki, xarici dünya ilə əlaqələri kəsilib.

"Bütün bu tədbirlər hüquq-mühafizə orqanları tərəfindən həyata keçirilib və kobud qanun pozuntusudur", deyə bəyanatda bildirilir.

Bütün bu tədbirlər yalnız ölkənin imicinə ziya vurur. Beynəlxalq təşkilatların tənqidinə baxmayaraq, hakimiyyət fəallara təzyiqi davam etdirir, İnsan Hüquqları və Əsas Azadlıqları haqqında Avropa Konvensiyasının maddələrini pozur.

"Biz, keçmiş siyasi məhbuslar cəmiyyətin "özümüzünkilərə" və "düşmənlərə" bölünməsinin qəti əleyhinəyik. Tənqidçilərə və fərqli düşünənlərə qarşı repressiyalara son qoyulmasını və qanunsuz həbs edilənlərin azad edilməsini tələb edirik", deyə bəyanatda bildirilir.

* ASMMM 2014-cü ilin oktyabrında bir qrup keçmiş "vicdan məhbusu" tərəfindən yaradılıb. -06D-