İ.Əliyev 2030-cu ilə qədər “ Milli Prioritetlər”i müəyyən edib

Bakı/02.02.21/Turan: Fevralın 2-də Azərbaycan Prezidenti İlham Əliyev “Azərbaycan 2030: sosial-iqtisadi inkişafa dair Milli Prioritetlər” sənədini təsdiq edib.

Milli prioritetlər 5 əsas istiqaməti özündə birləşdirir: dayanıqlı artan rəqabətqabiliyyətli iqtisadiyyat, dinamik, inklüziv və sosial ədalətə əsaslanan cəmiyyət, rəqabətli insan kapitalı və müasir innovasiyalar məkanı, işğaldan azad olunmuş ərazilərə böyük qayıdış, təmiz ətraf mühit və “yaşıl artım” ölkəsi.

Birinci istiqamət üzrə yüksək gəlirli iş yerlərinin yaradılması yolu ilə həyat səviyyəsinin hər il artmasını təmin edən iqtisadi artıma nail olmaq vəzifələri qoyulur.

Qeyri-neft sektorunun inkişafına, onun maliyyələşdirilməsində özəl sektorun payının artırılmasına xüsusi diqqət yetiriləcəyi nəzərdə tutulur.

İqtisadiyyatda uzunmüddətli investisiya resurslarının əsas mənbəyi olan kapitalın və sığorta bazarlarının inkişafını sürətləndirmək lazımdır.

Ölkə iqtisadiyyatına birbaşa xarici investisiyaların, o cümlədən infrastruktura strateji investorların cəlb edilməsi vəzifələri qoyulur.

Dövlət investisiyalarının və dövlət şirkətlərinin fəaliyyətinin iqtisadi səmərəliliyinin artırılması və bu sahədə şəffaflıq səviyyəsinin artırılması da nəzərdə tutulur.

Kölgə iqtisadiyyatını minimuma endirmək məqsədləri qoyulur.

Nazirlər Kabinetinə Milli Prioritetlərə uyğun olaraq “2021‒2025-ci illərdə sosial-iqtisadi inkişaf Strategiyası”nın layihəsini doqquz ay müddətində hazırlayıb prezidentə təqdim etmək tapşırılıb.—06D-