İ.Əliyev: Avropa İttifaqı bizim prioritetimizdir

Bakı/05.10.17/Turan: Avropa İttifaqı ilə münasibətlər Azərbaycan üçün prioritetdir, deyə prezident İlham Əliyev çərşənbə günü Avropa İttifaqının Brüsseldə akkreditə olunmuş səfirlərinin daxil olduğu Avropa İttifaqı Şurasının Siyasi və Təhlükəsizlik Komitəsinin nümayəndə heyəti ilə görüşdə bildirib.

Əliyev noyabrda Brüsseldə keçiriləcək Şərq Tərəfdaşlığı Sammitində iştirak edəcəyini təsdiq edib.

"Mən bu dəvəti prezident Tuskdan fevral ayında aldım və bildirdim ki, birmənalı olaraq, Azərbaycan lap əvvəldən "Şərq Tərəfdaşlığı" proqramına dəstək verdi. Mən şəxsən birinci Şərq Tərəfdaşlığı Sammitinində və sonuncudan başqa bütün sammitlərdə iştirak etmişəm. Bu gün bu vacib iclasda iştirak etməmək üçün əsas yoxdur", - deyə Əliyev davam edib.

"Biz eyni zamanda, öz hesabına yaşayan, siyasət, təhlükəsizlik, iqtisadi və maliyyə resursları cəhətdən geniş imkanlara malik müasir müstəqil ölkəyik", - deyə Əliyev bildirib.

O, Şərq Tərəfdaşlığı ölkələrindən ikisinin Avrasiya İqtisadi İttifaqında iştirak etdiyini, digər üçünün Aİ ilə Assosiativ saziş imzaladığını vurğulayıb.

"Qalan bir ölkə - Azərbaycan hazırda Tərəfdaşlıq Sazişi üzərində işləyir. Ona görə ölkələrə fərdi yanaşmanın tətbiqi ilk vaxtlardan bizim mövqeyimizin əsasını təşkil edib. Təəssüf ki, əvvəlki Avropa komissiyalarının vaxtında bizim yanaşmamız müsbət qəbul edilmədi. Əksinə, bəzən hücumlara məruz qaldıq. Hansısa xüsusi razılaşmanı tələb edən tərəf kimi ittiham olunduq. Bu, belə deyildi", deyə Əliyev qeyd edib.

O, Aİ ilə yeni sazişin tezliklə imzalanmasına tərəfdar olduğunu bildirib.

"Avropa irsi həmişə Azərbaycanda mövcud olub və indi təhlükəsizlik, siyasi inkişaf, ticarət, enerji, nəqliyyat, multikulturalizm kimi bütün vacib məsələləri özündə ehtiva edəcək yeni sazişlə biz Avropa İttifaqı ilə münasibətlərin uğurla inkişaf edəcəyinə ümid edirik", - deyə Əliyev bəyan edib.-06D-