İ.Əliyevin islahatlar, koronavirus və xalq düşmənləri haqqında dedikləri

Bakı/15.04.20/Turan: Aprelin 14-də hökumətin 2020-ci ilin birinci rübünün yekunlarına həsr olunmuş müşavirəsində dövlət başçısı bir sıra siyasi bəyanatlar verib. O, növbəti dəfə müxalifətə hücum edərək, onları xalq düşməni adlandırıb və anti-Azərbaycan qüvvələrin toplandığı Avropa Şurasını ittiham edib.

O, qabaqcadan xalqın böyük dəstəyini, ölkədə həyata keçirilən siyasi islahatları alqışladığını qeyd edib. Prezident islahat kimi hökumətdəki, prezident administrasiyasındakı və parlamentdəki dəyişiklikləri və "mənfi hallara" qarşı mübarizəni göstərib.

O, hakimiyyətin başlatdığı "siyasi dialoq" prosesini xüsusi olaraq vurğulayıb və müxalifətin bir hissəsinin bunu qiymətləndirməməsindən qəzəbini ifadə edib.

"Bizim əsas məqsədimiz elə siyasi sistem yaratmaqdır ki, fərqli baxışlardan asılı olmayaraq, hər bir siyasi qüvvə üçün bir amal müqəddəs olsun, o da dövlətçilik, müstəqillik, azadlıq, rifah və inkişafdır. Belə olan halda həm siyasi müstəvidə işlər müsbət istiqamətdə gedəcək, eyni zamanda, ölkədə mövcud olan problemlər daha tezliklə həll olunacaq. Çünki müxalifət nümayəndələri bəzən iqtidar nümayəndələrinin görmədiyi qüsurları görürlər, onları dilə gətirirlər, onları diqqətə çatdırırlar və bu, çox müsbət haldır", deyə Əliyev bildirib.

"Bəlkə mən hadisələri bir qədər qabaqlayıram. Çünki bu proses hələ təzə-təzə başlayır. Ancaq bəlkə ona görə qabaqlayıram ki, mən bu prosesin sürətlə getməsini arzulayıram. Şadam ki, bizim dialoq təklifinə müxalifət partiyalarının hamısı müsbət cavab verib və artıq siyasi dialoq başlayır. Əminəm ki, bu, ölkəmizə böyük fayda gətirəcəkdir", deyə o sözünə davam edib.

"Bu düşərgədə cəmləşən insanlar uzun illərdir iqtidara qarşı yox, dövlətimizə, xalqımıza qarşı çirkin mübarizə aparırlar. Onların əsas məqsədi vəziyyəti gərginləşdirməkdir. Ölkəmiz üçün, xalqımız üçün nə qədər pisdirsə, onlar üçün o qədər yaxşıdır", deyən Əliyev Xalq Cəbhəsi və Müsavat partiyalarını nəzərdə tutduğuna dəqiqlik gətirib. O, bu partiyaları xarici qüvvələrə işləməkdə və rəngli inqilab yolu ilə hakimiyyətə qayıtmaq cəhdində ittiham edib.

"Bu gün koronavirusa sevinən ancaq bu antimilli qruplaşmadır. Mən təbii ki, baş verən hadisələrdən xəbərdaram və bilirəm ki, bunların bu çirkin niyyətləri dəhşətli bir mənzərə yaradır. Ölənlərin sayının artmasını arzulayırlar, xəstələrin sayının artmasını istəyirlər, sevinirlər ki, insanlar vəfat edir. Yəni, bu, iqtidara qarşı deyil, dövlətə qarşı düşmənçilikdir. Əgər kimsə xalqımıza, dövlətimizə düşmənçilik edirsə, onun bir adı var - düşmən. 

Bunların indiki arzuları da gözlərində qalacaq. Marginal qruplaşmaya yeni konfiqurasiyada yer yoxdur və olmamalıdır", deyə Əliyev bildirib. 

Daha sonra o, bir çox digər beynəlxalq təşkilatlardan fərqli olaraq, Qarabağda keçirilən "prezident seçkilərini" pisləməyən Avropa Şurasını ittiham edib.

"Avropa Şurası Parlament Assambleyası 20 il ərzində Azərbaycanı qaralamaq, Azərbaycana şər, böhtan atmaq, Azərbaycanı nüfuzdan salmaq üçün əlindən gələni əsirgəmir".

"Avropa Şurası Parlament Assambleyası niyə susur? Ona görə ki, orada cəmləşən anti-Azərbaycan qüvvələr, ermənipərəst qüvvələr Azərbaycana düşmən gözü ilə baxırlar. Bizə qarşı o təşkilatdan gələn bütün iradların heç bir əhəmiyyəti yoxdur. Mən demişəm, bir daha demək istəyirəm ki, onların qəbul etdikləri qətnamələr, qərarlar mənim üçün kağız parçasından artıq deyil. O təşkilatın Azərbaycanla bağlı olan fikri məni maraqlandırmır və heç vaxt maraqlandırmayıb.

Bir məsələyə də diqqətinizi çəkmək istəyirəm. Azərbaycanla bağlı məruzəçilər var və bu məruzəçilər də susub, bir söz demirlər. Burada balaca bir hadisə baş verən kimi ölkəmiz haqqında ağızdolusu yalan, böhtan uydururlar. Nə üçün susublar? Bundan sonra onlar Azərbaycan üzrə məruzəçi olmaq mənəvi haqqını itiriblər. Azərbaycan xalqı hər şeyi yaxşı görür. Görür ki, bunların çirkin bəyanatlarının arxasında heç də Azərbaycanda demokratiya, insan haqlarının qorunması məsələsi dayanmır. Azərbaycanı qaralamaq, şantaj etmək, nüfuzdan salmaq, beləliklə, ölkəmizin maraqlarına zərbə vurmaq bu qurumun məqsədidir", deyə Əliyev bildirib. -02D-