İlham Əliyev Pakistan SQ Baş Qərargah rəisi ilə videogörüş keçirib

Bakı/03.03.21/Turan: Azərbaycan 44 günlük müharibə zamanı Pakistanın mövqeyini və dəstəyini yüksək qiymətləndirir. Bu barədə martın 3-də dövlət başçısı İlham Əliyev Bakıda üç günlük səfərdə olan Pakistanın Birləşmiş Qərargah Rəisləri Komitəsinin sədri general Nadim Raza ilə videoformatda keçirilən görüşdə bildirib.

“Müharibənin ilk günündən Pakistan Azərbaycana həmrəylik və dəstək nümayiş etdirdi. Pakistan Azərbaycanın işğal olunmuş ərazilərindən qoşunların dərhal və qeyd-şərtsiz çıxarılmasını tələb edən BMT Təhlükəsizlik Şurasının qətnamələrinin icrasının tərəfdarı kimi çıxış etdi. Azərbaycanda insanlar Pakistan xalqı ilə, ölkənizlə bağlı öz hisslərini nümayiş etdirdilər, müharibə zamanı Pakistan bayraqlarını dalğalandırdılar... 

... Biz artıq Azərbaycan, Türkiyə və Pakistan arasında siyasi və digər sahələrdə, o cümlədən müdafiə sahəsində üçtərəfli əməkdaşlıq formatının yaxşı nəticələrinin şahidi olduq. Hesab edirəm ki, biz səylərimizi birləşdirərək mövqelərimizi gücləndirəcəyik və sülhə töhfə verəcəyik”, deyə Əliyev qeyd edib.

Bakı və İslamabad arasında hərbi əməkdaşlığa gəlincə, bu, dünyada sülhün bərqərar olunması işinə töhfə verəcək, deyə o, əlavə edib.

Nadim Raza cavab sözündə Pakistanın Silahlı Qüvvələri və Pakistan xalqı adından Azərbaycanı 44 günlük müharibədə qələbə münasibətilə təbrik edib.

“Zəfəriniz eyni istəklə Pakistanda qeyd olundu. Buna görə, Zati-aliləri, cənab səfir hadisələrin gedişatı haqqında bizi daim məlumatlandırırdı. Müharibənin istənilən anında Azərbaycan Silahlı Qüvvələrinin əməliyyatları bizim kütləvi informasiya vasitələrində əsas başlıqla gedirdi”, deyə general bildirib.

Daha sonra tərəflər hərbi sahədə əməkdaşlığın inkişaf etdirilməsi məsələlərini və regional məsələləri müzakirə ediblər. -02D-