İsa Qəmbər Almaniyada müayinə olunacaq

Bakı/04.04.18/Turan: Milli Strateji Düşüncə Mərkəzinin sədri, Müsavat Partiyasının sabiq başqanı İsa Qəmbər müayinə olunmaq üçün aprelin 4-də Almaniyaya gedib. Bu barədə Turan-a Müsavat Partiyasının başqanı Arif Hacılı bildirib.

İ.Qəmbər Almaniyaya oğlu Turqut Qəmbərlə gedib. "İsa Qəmbər Almaniyada müayinədən keçəcək və bir qədər istirahət edəcək. Ola bilsin ki, yaxın on gündə Azərbaycana qayıtsın", - A.Hacılı qeyd edib.

A. Hacılı İ. Qəmbərin səhhəti ilə bağlı bildirib ki, bundan öncə müalicə zamanı istifadə etdiyi dərmanlar bəzi daxili orqanlarına zərər vurub.

"Təhlükəli qeyri-adi bir halı mövcud deyil".

Öz növbəsində İ. Qəmbərin oğlu T.Qəmbər Turan-a bildirib ki, atasının səhhəti yaxşıdır.

2018-ci il yanvarın 13-də ürəyində narahatlıq yaranan İ.Qəmbər Bakıda Mərkəzi Klinikaya yerləşdirilib, ürəyinə stend qoyulub və yanvarın 18-də evə buraxılıb.

Fevralın sonlarında yenidən Mərkəzi Klinikaya müraciət edib, klinika bunun sırf profilaktik xarakterli olduğunu bildirib.

Fevralın 28-də İ. Qəmbər Müsavat Partiyasının başqanı Arif Hacılı ilə Türkiyəyə gedib. O, Ankara Hacettepe Universiteti xəstəxanasının nevrologiya şöbəsində müalicə olunub.

Xəstəxananın nevrologiya bölümündən BBC radiosuna bildiriblər ki, İ. Qəmbər Bakıda beyin qanaması keçirib.

"Qanaması böyükdür, amma vəziyyəti stabildir. Bütün nevroloji müayinələri normaldır. Danışır. Yemək yeyir. Hərəkətdədir. Beyin qanaması ona fiziki mənada heç bir təsir göstərməyib. Beyin qanaması ilə bağlı hər hansı nevroloji defisiti yoxdur. Gücü, qüvvəti yerindədir. Həftə içində Bakıdakı hər hansı xəstəxanaya köçürməyi düşünürük. Sadəcə, onun istirahət etməsi lazımdır", - BBC xəstəxanadakı mənbəyə istinadən yazıb.

İ. Qəmbər martın 14-də Hacettəpə xəstəxanasından çıxıb və Bakıya gəlib.

İ. Qəmbər Azərbaycan Xalq Cəbhəsinin qurucularındandır, 1992-1993-cü illərdə parlamentin sədri olub, müəyyən müddət prezident səlahiyyətlərini icra edib.

1992-ci ildən 2015-ci ilə kimi Müsavat Partiyasının başqanı olub.-0-