İşğaldan azad edilmiş ərazilərdə xüsusi nümayəndəliklər yaradılır

Bakı/19.01.21/Turan: Prezident İlham Əliyev 2021-ci il yanvarın 19-da "İşğaldan azad edilmiş ərazilərdə Azərbaycan Respublikası prezidentinin xüsusi nümayəndələri haqqında" fərman imzalayıb.

Sənəd işğaldan azad edilmiş ərazilərin dirçəlişi istiqamətində quruculuq, bərpa və yenidənqurma işlərinin sürətləndirilməsi, bu hədəfə nail olunmasında dövlət orqanlarının (qurumlarının) və digər təşkilatların əlaqələndirilmiş fəaliyyətinin gücləndirilməsi, habelə idarəetmədə çevikliyin və səmərəliliyin artırılması məqsədilə imzalanıb. 

Fərmana əsasən, işğaldan azadedilmiş ərazilərdə  ölkə prezidentinin xüsusi nümayəndəlikləri təsis edilib.

Xüsusi nümayəndəliklərə prezident tərəfindən vəzifəyə təyin və vəzifədən azad edilən, birbaşa prezidentə tabe olan xüsusi nümayəndələr rəhbərlik edirlər.

Sənədə əsasən xüsusi nümayəndə prezidentin müəyyən etdiyi ərazi hüdudlarında prezidenti təmsil edən vəzifəli şəxsdir və müəyyən edilən ərazi hüdudlarında prezidentin müəyyən etdiyi səlahiyyətləri həyata keçirir.

PrezidentAdministrasiyasına prezidentin xüsusi nümayəndəlikləri haqqında əsasnamənin layihəsini və xüsusi nümayəndəliklərin fəaliyyətinin təşkilinə dair təkliflərini on beş gün müddətində prezidentə təqdim etmək, Nazirlər Kabinetinə isə bu fərmandan irəli gələn məsələləri həll etmək tapşırılıb. .—06D-