İstintaq Təcridxanasında Abzas Media-nın jurnalistinə fiziki təzyiq göstərilib

1 saylı Bakı İstintaq Təcridxanasında saxlanılan Abzas Media nəşrinin jurnalisti Nərgiz Absalamova nəzarətçi tərəfindən zorakılığa məruz qalıb.

Abzas Media-nın Facebook səhifəsində yerləşdirilən məlumata görə, Absalamova vəkillə görüşdən qayıdarkən həmkarı Sevinc Vaqifqızının saxlanıldığı kameraya yaxınlaşaraq ona salam vermək istəyib. Bu zaman onu xüsusi zorakılıqla kameranın qarşısından uzaqlaşdırmağa çalışan Aygül Babayeva adlı nəzarətçi dırnaqları ilə jurnalistin qolunu bir neçə yerdən dərin cızıb. Absalamova qeyd edib ki, bu, həmin nəzarətçinin ilk belə davranışı deyil və o, bundan əvvəl də bir neçə dəfə jurnalistlərə qarşı xüsusi zorakılıq və kobudluq hallarına yol verib

Bir neçə gün əvvəl Babayeva Sevinc Vaqifqızına qarşı da güc tətbiq edib.

Penitensiar Xidmətdən münasibət öyrənmək mümkün olmayıb.

* 2023-cü ilin noyabr - 2024-cü ilin yanvar aylarında Abzas Media-nın rəhbərləri və əməkdaşları - Ülvi Həsənli, Sevinc Vaqifqızı, Məhəmməd Kekalov, Nərgiz Absalamova və Elnarə Qasımova, həmçinin araşdırmaçı jurnalist, Turan agentliyinin əməkdaşı Hafiz Babalı Həbs olunub. Mayda bu iş üzrə iqtisadçı və "Azadlıq Radiosu"nun əməkdaşı Fərid Mehralızadə də həbs olunub.

Onlara qarşı xarici valyuta qaçaqmalçılığı, qanunsuz sahibkarlıq, cinayət yolu ilə əldə edilmiş əmlakı leqallaşdırmaq və vergi ödənişindən yayınmaq ittihamları irəli sürülüb.