Laçın dəhlizindən 9 noyabr 2020-ci il tarixli bəyanata uyğun istifadə edilməlidir - Rusiya Xarici İşlər Nazirliyi

Bakı/30.12.22/Turan: Rusiya Xarici İşlər Nazirliyi cümə günü rəsmi nümayəndə Mariya Zaxarovanın Laçın dəhlizi ətrafındakı vəziyyətlə bağlı şərhini dərc edib.

“Rusiya, Azərbaycan və Ermənistan liderlərinin 9 noyabr 2020-ci il tarixli Bəyanatına uyğun olaraq vətəndaşların, nəqliyyat vasitələrinin və yüklərin hər iki istiqamətdə hərəkəti üçün Laçın dəhlizinin tam fəaliyyətinin bərpasında irəliləyişin olmamasından narahatlığımızı bildiririk. Rusiya tərəfi, xüsusən də Rusiya sülhməramlı kontingentinin (RSK) rəhbərliyi bu vəziyyətin həlli üçün ardıcıl addımlar atmağa davam edir”, şərhdə deyilir.

“Biz sülhməramlılarımıza qarşı hər hansı açıq hücum və təxribatları qəbuledilməz və Ermənistan-Azərbaycan münasibətlərinin normallaşması prosesinə ciddi ziyan vuran məqsədyönlü hərəkətlər kimi qiymətləndiririk.

Biz Bakı və İrəvanı Rusiya, Azərbaycan və Ermənistan liderlərinin 9 noyabr 2020-ci il tarixli Bəyanatının bütün müddəalarına ciddi əməl etməyə çağırırıq. Qeyd edirik ki, Laçın dəhlizindən yalnız bu sənəddə göstərilən məqsədlər üçün istifadə edilməlidir. Ümid edirik ki, tərəflər regionda filiz yataqlarının işlənməsi ilə bağlı razılığa gələcəklər”, - şərhdə vurğulanır.

“Biz regionda nəqliyyat və iqtisadi əlaqələrin qarşısının alınmasına, Ermənistan-Azərbaycan sərhədinin delimitasiyasına, Bakı ilə İrəvan arasında sülh müqaviləsinin hazırlanmasına və ictimai xadimlər, ekspertlər və iki ölkənin parlamentariləri arasında əlaqələrin qurulmasına yönəlmiş bütün üçtərəfli sazişlər kompleksinin ən yüksək səviyyədə hərtərəfli həyata keçirilməsinin tərəfdarıyıq”, - yekunda deyilir.

Şərhdə diqqət çəkən məqam “Laçın dəhlizindən yalnız bu sənəddə göstərilən məqsədlər üçün istifadə edilməsi” ifadəsidir.

Diqqətçəkən digər məqam isə odur ki, şərhdə yolun Şuşa şəhəri yaxınlığındakı hissəsində nəzarəti bərqərar edən Azərbaycan tərəfinin hərəkətləri tənqid olunmur.

Qeyri-rəsmi məlumatlara görə, Rusiya sülhməramlılarının yük maşınları Şuşa yaxınlığındakı keçid məntəqəsindən keçərkən Azərbaycan nümayəndələri tərəfindən yoxlanılır. Bu faktı nəzərə alsaq, Laçın yolunda Azərbaycan postunun yaradılmasının Rusiya tərəfi ilə razılaşdırıldığını və onun rəsmi açılışının yaxın gələcəyin işi olduğunu güman etmək olar.

Erməni tərəfinə gəlincə, Xankəndinin davam edən blokada ilə bağlı açıqlamaları separatçıların yeni reallıqlara dözmək istəmədiklərini və Azərbaycan tərəfinin nəzarətində olan yolda hərəkət etməkdən imtina etdiklərini göstərir. -0