Latviya və Estoniya RF-nin Ukraynadakı cinayətlərini Ukrayna xalqının soyqırımı kimi tanıyıb

Kiyev/21.04.22/UNİAN: Latviya və Estoniya parlamentləri Rusiyanın Ukrayna xalqına qarşı soyqırım törətdiyini tanıdıqları haqqında bəyanat qəbul ediblər.

Bu barədə Latviya Seyminin və Estoniya Riyqikoqusunun mətbuat xidmətlərinin məlumatında deyilir.

Cümə axşamı, aprelin 21-də Latviya Seymi Rusiya Federasiyasının təcavüzü və Ukraynada hərbi cinayətlər haqqında bəyanatı yekdilliklə qəbul edib. Seymin bəyanatında hazırda Rusiyanın Ukrayna xalqına qarşı soyqırım törətdiyi etiraf olunur.

"Seym Rusiyanın hərbi təcavüzünü və Belarus rejiminin dəstəyi və iştirakı ilə Ukraynaya genişmiqyaslı hücumu qətiyyətlə pisləyir. Bəyanatda qeyd edilir ki, Rusiyanın Ukrayna ərazisini əsassız işğal etməsi Ukraynanın suverenliyinin və ərazi bütövlüyünün kobud pozuntusu, Rusiyanın BMT Nizamnaməsi və beynəlxalq hüquq üzrə öhdəliklərinin açıq-aşkar pozuntusudur", deyə məlumatda bildirilir.

Bəyanat qəbul edildikdən sonra Seymin xarici işlər komitəsinin sədri Rixard Kol Ukrayna əhalisini bəşəriyyətə qarşı yönəlmiş gələcək cinayətlərdən qorumağa və ölkənin öz torpaqlarını işğalçılardan azad etməsinə kömək etməyə çağırıb.

"Buna yalnız Avropa Şurasının Ukraynaya silah tədarükünü təcili və kəskin şəkildə artırması və Rusiyadan enerji daşıyıcıları idxalını dərhal dayandırması ilə nail olmaq olar", deyə o qeyd edib.

Riyqikoqu da Rusiya Federasiyasının Ukraynada törətdiyi hərbi cinayətlər və soyqırım haqqında 84 deputatın təqdim etdiyi bəyanatı qəbul edib. Bəyanata əsasən, Riyqikoqu Rusiya silahlı qüvvələrinin və hərbi-siyasi rəhbərliyinin Ukrayna xalqına qarşı əməllərini soyqırım kimi tanıyır və digər ölkələrin parlamentlərini və beynəlxalq təşkilatları da buna çağırır.

"Rusiya Federasiyası müvəqqəti olaraq işğal olunmuş ərazilərdə, xüsusən Buça, Borodyanka, Qostomel, İrpen və Mariupol şəhərlərində, həmçinin Ukraynanın bir çox digər yaşayış məntəqələrində dinc əhaliyə qarşı soyqırım aktları, o cümlədən kütləvi vəhşiliklər törədib. Bu əməllər insanların oğurlanmasından, deportasiyasından, azadlıqdan məhrum edilməsindən, işgəncələrə, zorlamalara məruz qoyulmasından, habelə cəsədlərin təhqir edilməsindən ibarət olub", deyə bəyanatda bildirilir.

Riyqikoqu həmçinin Rusiyanın cinayətlərinin araşdırılmasına və təqsirkarların məsuliyyətə cəlb edilməsinə dəstək göstərməyə, bu məqsədlə dövlətlərlə birlikdə beynəlxalq məhkəmə yaratmağa çağırır.

Bundan başqa, Estoniya parlamenti dünya ölkələrini Rusiyaya qarşı sanksiyaları dərhal sərtləşdirməyə, o cümlədən Rusiya ilə enerji daşıyıcıları ticarətini istisnasız olaraq dayandırmağa və Ukraynaya hərbi və kritik humanitar yardımı dərhal artırmağa çağırır. -0-