"Lukoyl" Ermənistan üzərində vurulmuş Rusiya vertolyotunun həlak olmuş ekipaj üzvlərinin ailələrinə yardım edəcək

Bakı/20.11.20/Turan: "Lukoyl" Xeyriyyə Fondu 9 noyabr 2020-ci il tarixində Ermənistan ərazisi üzərində vurulmuş Rusiya vertolyotunun həlak olmuş ekipaj üzvlərinin ailələrinə 10 mln. rubl ayıracaq, həmçinin əlavə olaraq onlardan birinin ailəsi üçün Voronejdə mənzil alacaq. Bu barədə “Lukoyl" şirkətindən Turan agentliyinə daxil olan press-relizdə deyilir.

Ekipajın zərərçəkmiş üzvü baş leytenant Vyacheslav Qryazin şirkətdən 5 mln. rubl məbləğində yardım alacaq, bu barədə press-relizdə deyilir.

Xatırladaq ki, Mi-24 hərbi vertolyot qaranlıq vaxtı Azərbaycan və Ermənistan sərhəddinin yaxınlığında aşağı hündürlükdə uçub. Yerdən raket ilə vurulub.

Azərbaycan bu insidentdə günahı etiraf edərək baş verənləri faciəvi təsadüf adlandırıb. Faktla bağlı cinayət işi başlanılıb. Bakı bu insidentdə təqsirli olan hərbçilərin cəzalandırılacağını vəd edib. -02D-