Milli Məclisin deputatı Madər Musayev vəfat edib

Bakı/14.07.23/Turan:  İyulun 14-də Milli Məclisin 10 saylı Binəqədi üçüncü seçki dairəsi üzrə deputatı Madər Musayev vəfat edib.

Deputatın ölüm xəbərini köməkçisi Gümüş İbadova təsdiqləyib. 

Onun sözlərinə görə, deputatın səhhətində problemlər yaranmışdı və  xəstəxana şəraitində müalicə alırdı.

Madər Musayev 1947-ci il noyabrın 26-da Bakıda anadan olub.

Sovet illərində ticarət sistemində çalışıb. SSRİ-nin süqutundan sonra sahibkarlıq fəaliyyətilə məşğul olub.

1990-cı ildə  Azərbaycan Ali Sovetinin deputatı seçilib.

1995-ci ildən bütün çağırışlarda Milli Məclisin tərkibinə daxil olub.

Musayevin ölümündən sonra Milli Məclisin deputatlarının sayı 117-yə enib.

Milli Məclisin hazırkı tərkibi 2020-ci il seçkilərində formalaşıb. Sonra 4 dairədə seçkilərin nəticələri ləğv edilib və yeni seçkilər keçirilməyib.

Sonradan deputatlardan biri, Eldəniz Səlimov cinayət məsuliyyətinə cəlb olunması ilə əlaqədar səlahiyyətlərindən məhrum olub. Digər üç deputat vəfat edib. 06B