Müxalifət liderləri: «Növbədənkənar prezident seçkiləri saxtalaşdırmanın asan yoludur�

Bakı/05.02.18/Turan: Milli Şuranın sədri Cəmil Həsənli növbədənkənar prezident seçkilərinin elan edilməsini hakimiyyətin əldə saxlanılması üçün edilən cəhd kimi qiymətləndirib.

"Növbədənkənar prezident seçkiklərinin elan edilməsinə münasibətim yaxşı deyil. Bunun arxasında hakimiyyətin hansısa niyyətləri dayanır. Azərbaycanda növbədənkənar prezident seçkilərinin keçirilməsinə heç bir ehtiyac yoxdur. Bir müddət əvvəl, təxminən üç həftə əvvəl Azərbaycanda prezident seçkilərinin oktyabrın 17-də keçirilməsi barədə rəsmi açıqlama verilmişdi. Prezident seçkilərinin vaxtının əvvələ çəkilməsi hakimiyyətin hansısa niyyətlərindən xəbər verir. Bu, təhlil edilməlidir və bunun səbəbləri araşdırılmalıdır. İndi mən bunun nə ilə bağlı olduğunu dəqiq deyə bilmərəm. Amma bütün hallarda ölkədə sosial-iqtisadi vəziyyətin ağırlaşması, hakimiyyətin onsuz da olmayan nüfuzunun artıq hər ay deyil, hər həftə düşməsi və eyni zamanda nəzarətində olan Mərkəzi Seçki Komissiyasının vasitəsilə tələsik seçki keçirib hakimiyyəti növbəti yeddi il ərzində ailənin nəzarətində saxlamaqdır", - növbədənkənar prezident seçkiləri barədə qərarı Turan-a şərh edərkən bildirib.

C.Həsənli Milli Şuranın sərəncamı müzakirə etdikdən sonra növbədənkanar prezident seçkilərində iştirak edib-etməyəcəyi barədə məlumat verəcəyini bildirib.

Öz növbəsində Milli Strateji Düşüncə Mərkəzinin rəhbəri, Müsavat Partiyasının prezident seçkilərində namizədi İsa Qəmbərin fikrincə, hakim rejim vəziyyətin ağırlığını dərk edir və başa düşür ki, əgər konstitusiyada nəzərdə tutulan müddəti gözləsələr, seçki keçirmək üçün bu ilin oktyabr ayını gözləsələr, həmin dövrdə cəmiyyətdə sosial-iqtisadi narazılıq və siyasi narazılıq bu gün olduğundan qat-qat çox olacaq. Seçkiləri saxtalaşdırmaq və saxta üsullarla, zorakı yollarla hakimiyyətdə qalmaq daha da çətinləşəcək. "Bir tərəfdən, böhranın dərinləşməsi və hakimiyyətin böhrana qarşı düzgün vasitələr və üsullar seçə bilməməsi, digər tərəfdən, cəmiyyətdə narazılıqların artması, üçüncü tərəfdən də beynəlxalq birliyin, Qərbin sistemli fəaliyyəti nəticəsində Rusiyada Putinin rejiminin vəziyyətinin ağırlaşması Azərbaycandakı hakim rejimin də vəziyyətinin ağırlaşmasına gətirib çıxarır. Ona görə də tələsirlər və tələm-tələsik saxta prezident seçkiləri keçirib hakimiyyətlərini uzatmağa cəhd göstərirlər. Təbii ki, Azərbaycanın demokratik qüvvələri, aparıcı siyasi təşkilatları, bütövlükdə Azərbaycan cəmiyyəti bu məsələyə prinsipial reaksiya verməlidir", - o bildirib

İ. Qəmbər növədənkənar prezident seçkilərində iştirak edib- etməyəcəyi ilıə bağlı sualın cavabında bildirib ki, onun namizədliyi qüvvədədir: "Mənim prezidentliyə namizədliyim 2014-cü ilin sentyabrında Müsavat Partiyasının 8-ci qurultayında irəli sürülüb. Ona görə namizədliyim qüvvədədir". Ancaq yaranmış vəziyyətlə əlaqədar müzakirələr keçiriləcək, o qeyd edib.-03B06--