Paşinyan təsdiq edib ki, Ermənistan və Azərbaycan arasında “sovet” sərhədi bərpa ediləcək

Bakı/27.11.20/Turan: Ermənistan və Azərbaycan delimitasiyanı sovet sərhədləri əsasında həyata keçirir, bu barədə Ermənistan baş naziri Nikol Paşinyan cümə günü xalqa videomüraciətində Kəlbəcərdə Zod (Söyüdlü) qızıl yatağı ilə bağlı vəziyyəti şərh edərkən bildirib.

Onun sözlərinə görə, proses 9 noyabr tarixli sazişin həyata keçirilməsi çərçivəsində gedir. Paşinyan növbəti dəfə qeyd edib ki, sənədin imzalandığı vəziyyətdə başqa çıxış yolu yox idi. İstənilən başqa variant bundan daha pis ola bilərdi, deyən baş nazir eyni zamanda “vəziyyət niyə kritik nöqtəyə çatdı”, deyə sual edib.

Onun sözlərinə görə, “sərhəd gözlə deyil, GPS-koordinatlarla müəyyən edilir”. O etiraf edib ki, qızıl mədəninin bir hissəsi Ermənistanda, bir hissəsi isə Azərbaycanda yerləşir.

Baş nazir əlavə edib ki, delimitasiya Azərbaycan tərəfin iştirakı ilə həyata keçirilməli olan mürəkkəb prosesdir. -02D-