Pentaqon: Ukraynanın Rusiyaya qalib gəlmək üçün döyüş əhval-ruhiyyəsi var

Vaşinqton/22.04.23/Turan: Gələn ay Amerika qoşunları ukraynalılara M1A1 Abrams döyüş tankları ilə iş üzrə təlim verməyə başlayacaq, xəbəri Turan-ın Vaşinqtondakı müxbiri Pentaqona istinadla verib.

"Əminəm ki, bu texnika və hərbiçilərin hazırlığı Ukrayna qüvvələrinin döyüş meydanında uğurlarını davam etdirməsinə imkan verəcək", deyə müdafiə naziri Lloyd Ostin cümə günü 50-yə yaxın müttəfiq ölkənin daxil olduğu Ukraynanın müdafiəsi üzrə Əlaqə Qrupunun 11-ci iclasının yekunlarına həsr olunmuş mətbuat üçün brifinqdə bildirib. 

ABŞ Ukraynaya 31 Abrams tankı göndərir, onlar əvvəlcə Almaniyanın Qrafenvyer şəhərinə gedəcək, burada 250-yə yaxın ukraynalı bu ağır hərbi maşınlarda 10 həftəlik təlim kursu keçəcək. 

Öz növbəsində, Qərargah Rəislərinin Birləşmiş Komitəsinin sədri general Mark Milli xatırladıb ki, təcavüzün başlanğıcından etibarən bir ildən çoxdur Ukrayna "mübarizəni davam etdirir, müttəfiqlər və tərəfdaşlar isə onu dəstəkləməyə və yanında dayanmağa davam edir".  

Milli əlavə edib ki, Putin NATO-nu parçalaya biləcəyini düşünərkən "yanılıb". Rusların döyüş əhval-ruhiyyəsinin zəiflədiyi, nizam-intizamının azaldığı bir vaxtda Ukraynanın ruhu "qırılmayıb". "Hazırda NATO-nun 31 üzvü var və NATO hər zaman olduğundan daha güclüdür", deyə o qeyd edib. 0