Prezident İlham Əliyev avqustda Moskvaya rəsmi səfərə gedəcək

Moskva/13.06.18/Turan: RF prezidenti Vladimir Putin çərşənbə günü Moskvada Azərbaycan prezidenti İlham Əliyev ilə görüşündə bildirib ki, avqustun 30-da Azərbaycan liderinin Rusiyaya səfərini gözləyir.

"İkitərəfli münasibətlərə gəlincə, avqustun 30-da sizin Rusiyaya səfəriniz zamanı bunu müzakirə edəcəyik. Ancaq bundan öncə bizim həmkarlarımız sizin Rusiyaya səfərinizi hazırlayacaqlar. Amma indidən demək olar ki, münasibətlər çox uğurla inkişaf edir", - V.Putin deyib.

Rusiya prezidenti vurğulayıb ki, ötən il ərzində iki ölkə arasındakı əmtəə dövriyyəsinin artımı 34,4 faiz, bu ilin birinci rübü ərzində isə daha 19 faizə yaxın olub.

"Bu, çox yaxşı artım tempidir və biz bunu dəstəkləməliyik. Siyasi məsələlərə gəlincə, burada da vəziyyət sabitdir. Parlamentlərin, ictimai təşkilatların xətti ilə daim əlaqə saxlanılır, humanitar əlaqələr inkişaf edir", deyən V.Putin avqustun 30-da İ.Əliyevin Rusiyada rəsmi səfərdə olacağını ifadə edib.

O, əlavə edib ki, həmin səfər zamanı ikitərəfli münasibətlərin hərtərəfli və dərindən müzakirə ediləcəyini vurğulayıb.

İyunun 12-də qeyd edilən Rusiya Günü, eləcə də futbol üzrə dünya çempionatına hazırlığın uğurla başa çatması münasibətilə V.Putini təbrik edən Azərbaycan prezidenti İlham Əliyevikitərəfli münasibətlərin inkişafından məmnun olduğumu bildirib.

Avqustun sonunda Rusiyaya səfərə dəvətini görə həmkarına təşəkkür edən İ.Əliyev deyib ki, bu gün də kifayət qədər geniş olan gündəlikdəki cari məsələlərə dair fikir mübadiləsi aparmaq imkanı var.

"Bizim daimi xarakter daşıyan müntəzəm əlaqələrimiz münasibətlərimizə böyük təkan verir. Biz bunun yaxşı nəticələrini görürük. Bizim qarşılıqlı siyasi fəaliyyətimiz çox yüksək səviyyədədir. Biz etibarlı dostlar və tərəfdaşlar, strateji tərəfdaşlarıq. Siz qeyd etdiyiniz kimi, iqtisadi sahədə dinamika ötən il də, bu il də çox müsbətdir. İqtisadi əməkdaşlığın genişləndirilməsinə dair planlar var. Biz "Şimal-Cənub" layihəsinin həyata keçirilməsinin artıq konkret nəticələrini görürük. Artıq Azərbaycan vasitəsilə Rusiyadan yükdaşımalar artır, bu da bizim fəaliyyətimizin müsbət nəticəsidir", deyən İ.Əliyev iki ölkə arasında bütün sahələrdə münasibətləri nümunəvi adlandırıb.

O, gələcəyə, əlaqələrimin möhkəmlənməsinə ümidlə baxdığını ifadə edib.

Prezident İlham Əliyev iyunun 12-si gecə saatlarında Rusiya Federasiyasına gedib.

İyunun 14-də Rusiyada futbol üzrə XXI dünya çempionatı start götürəcək. 32 yığma komandanın qatıldığı yarışın açılış mərasiminə Azərbaycan prezidentinin də qatılacağı gözlənir.