Prezident İlham Əliyev: “Azərbaycan münaqişənin siyasi həllinə hazırdır”

Bakı/03.11.20/Turan:  “Biz hesab edirik ki, münaqişənin hərbi həlli siyasi müstəviyə keçməlidir və biz buna hazırıq. Güman edirəm ki, Ermənistanın acı məğlubiyyəti onları ciddi düşünməyə və bu qərara gəlməyə məcbur edəcək. Amma bunun əksini görürük”. Bu barədə noyabrın 3-də Azərbaycan prezidenti İlham Əliyev Tvitter hesabında yazıb.

“Biz nəinki öz torpaqlarımızı düşməndən azad edirik, həm də region üçün böyük təhlükə mənbəyi olan erməni faşizminin qarşısını alırıq”, - o, davam edib.

Bu yazı noyabrın 2-də axşam prezident Putinlə söhbətdən sonra dərc edilib. Buna görə də belə qənaətə gəlmək olar ki, siyasi nizamlama mövzusu yenidən Rusiya prezidenti tərəfindən qaldırılıb.

Amma hərbi məğlubiyyətin Ermənistanı düşündürməməsi ilə bağlı İ.Əliyevin bəyanatı göstərir ki, Paşinyan Putinlə söhbət zamanı öz mövqeyindən geri çəkilməyib və əvvəlkitək Qarabağın müstəqilliyinə təkid edir. Bu, yalnız o deməkdir ki, müharibə davam edəcək.

İ.Əliyev Tvitterdəki bu yazısı ilə hazırda siyasi nizamlanmanın niyə mümkün olmadığına işarə edir. -02B-