Prezident İlham Əliyev: “Biz sübut etdik ki, münaqişənin hərbi həlli mümkündür”

Bakı/10.12.20/Turan: "Müharibənin ilk günündən Türkiyənin dəstəyini hiss etmişik.Türkiyə prezidentinin birmənalı sərt bəyanatları Azərbaycanda böyük sevinc yaratdı və bizim haqlı mübarizəmizə real dəstək oldu. Buna görə də Türkiyənin bugünkü paradda iştirakı tamamilə qanunauyğundur və haqlıdır", - prezident İlham Əliyev dekabrın 10-da Bakıda Qələbə Paradını açarkən bildirib.

"Biz tarixi qələbə qazandıq. Biz 30 il bundan öncə Ermənistan tərəfindən işğal edilmiş torpaqlarımızın azad olunması uğrunda mübarizə apardıq. Ermənistan hər zaman Azərbaycan əhalini qovub. Bu 80-ci illərin sonlarında Ermənistanda yüz minlərlə azərbaycanlının qovulduğu vaxt başlanıb. Daha sonra Qarabağda bütün azərbaycanlıların qovulması ilə etnik təmizləmə prosesi başlayıb və nəhayət, azərbaycanlılar Qarabağın ətrafındakı yeddi rayondan qovulub", - o qeyd edib.

Ərazilərin azad edilməsi və ərazi bütövlüyünün bərpası üzrə diplomatik səylər məlum qətnamələrin qəbul edilməsinə və Azərbaycanın işğal edilmiş ərazilər üzərində suverenliyinin tanınmasına gətirib çıxarıb. Ancaq Ermənistan bunu etiraf etmək və işğal olunmuş torpaqları sülh yolu ilə geri qaytarmaq istəməyib.

"Biz bütün bu illər ərzində hazırlaşmışıq və münaqişənin hərbi yolla həllini heç vaxt istisna etməmişik.

Bu gün biz tarixi ədaləti bərpa etdik. Hərbi həll qaçılmaz idi, çünki dünya birliyi münaqişənin həlli üçün heç nə etmədi". Son iki ildə Ermənistan hakimiyyətinin siyasəti bir daha göstərdi ki, danışıqlar mənasızdır. Bundan əlavə, Yerevan Azərbaycana qarşı hərbi təxribatları gücləndirib, müharibəyə hazırlaşdığına işarə etməyə başlamışdı.

"Biz sentyabrın 27-də Ermənistanın növbəti hərbi təxribatından sonra hərbi əməliyyatlara başlamaq məcburiyyətində qaldıq. Mən əmr verdim ki, irəli Azərbaycan ordusu, torpaqlarımızı azad edək!

44 gün ərzində biz hər gün irəli gedərək yeni mövqelər tutaraq bir çox uğurlu əməliyyatlar həyata keçirdik. Bu müqəddəs müharibənin sonu Şuşanın azad edilməsi oldu. Yalnız bundan sonra Ermənistan kapitulyasiya etdi", - İ.Əliyev qeyd edib.

"Biz sübut etdik ki, münaqişənin hərbi həlli var, halbuki, vasitəçilər bunun mümkün olmadığını iddia edirdilər. Biz erməni işğalçıların belini qırdıq, başlarını əzdik, onların ordusunu darmadağın etdik. Əgər Ermənistan nə vaxtsa yenidən  təcavüzə cəhd göstərsə, daha da güclü şəkildə məğlub olacaq", - o deyib.

Müharibə Azərbaycan xalqının misilsiz birliyini və ordu ruhunun gücünü göstərdi.

"Bütün müharibə dövründə bizdə heç bir fərari olmadı, halbuki, Ermənistan tərəfində 10 min fərari vardı ", - İ.Əliyev bildirib.

İ.Əliyev çıxışını yekunlaşdıraraq deyib: "Qarabağ Azərbaycandır! Yaşasın Azərbaycan-Türkiyə qardaşlığı!”-02В-