Prezident İlham Əliyev: “Bizim Ermənistana ərazi iddialarımız yoxdur”

Bakı/13.04.21/Turan: Azərbaycan gözləyir ki, ATƏT-in Minsk Qrupu regionda dinc həyatın gələcəkdə qaydaya salınması ilə bağlı təkliflərini təqdim etsin, bu barədə prezident İlham Əliyev bu gün "Cənubi Qafqaza yeni baxış: Münaqişədən sonrakı inkişaf və əməkdaşlıq" konfransında bildirib.

Onun sözlərinə görə, Minsk Qrupu müharibədən sonrakı vəziyyətlə bağlı rol oynaya bilər. "Münaqişənin nizamlanmasına kömək edən qrup kimi yox, münaqişə artıq həll edilib. Ermənistanın sülh razılaşmasına hazır olduğu təqdirdə, beynəlxalq oyunçular üçün bir çox fəaliyyət sahələri yaranacaq. Bu, sərhədlərin demarkasiyası, delimitasiyası, digər məsələlər üzrə qarşılıqlı fəaliyyət məsələlərinə aiddir.

Ümid edirəm ki, onlar (ATƏT-in Minsk Qrupu) tezliklə bəzi təkliflərlə gələcəklər və biz onları çox diqqətlə öyrənəcəyik", - Azərbaycan prezidenti deyib.

Bununla yanaşı, İlham Əliyev vurğulayıb ki, Azərbaycanın Ermənistana ərazi iddiaları yoxdur. "Zəngəzur qədim Azərbaycan ərazisidir.  101 il öncə, 1920-ci ildə Ermənistana verilib", - İlham Əliyev deyib.

Tarixən azərbaycanlılar indi Sevan adlanan Göyçə gölü ətrafındakı ərazidə-İrəvanda məskunlaşıblar.

"XX əsrin əvvəllərinin xəritəsinə baxmaq kifayətdir. Orada Sevanı görməyəcəksiniz. Orada Göyçə var. İrəvanla da belədir. Onlar İrəvanın tarixi hissəsini dağıdıblar. Bu, məlum faktdır ki, burada mənim əcdadlarım da daxil olmaqla azərbaycanlılar yaşayıblar", - İlham Əliyev qeyd edib.

“Lakin bu o demək deyil ki, bizim ərazi iddialarımız var: "Mən hətta çox danışdım. Dedim ki, biz oraya qayıdacağıq, amma demədim ki, tanklarla qayıdacağıq. Əgər biz Zəngəzura qayıdırıqsa, bu yoldan istifadə ediriksə, niyə biz İrəvana qayıtmayaq. Vaxt gələcək, biz bunu edəcəyik", -  İlham Əliyev deyib.—06D-