Prezident İlham Əliyev CQD və Avropaya qaz nəqli barədə

Bakı/12.02.21/Turan: Azərbaycan qazının Avropaya ixracı üçün boru kəməri infrastrukturunun yaradılmasını nəzərdə tutan "Cənub" qaz dəhlizinin (CQD) inşası, həmçinin bu boru kəmərləri ilə qaz nəqli üçün resurs baza - "Şahdəniz-2" yatağının işlənməsi $33 mlrd.-a başa gəlib.

Azərbaycan qazının Avropaya çıxarılması üzrə layihənin reallaşdırılması zamanı qənaət $11,6 mlrd. təşkil edib, Azərbaycan prezidenti İlham Əliyev bildirib.

“İlkin olaraq bu işlərin dəyəri $44,6 mlrd. həcmində qiymətləndirilirdi, lakin effektiv idarəetmə və düzgün planlaşdırma sayəsindı layihənin dəyərini $33 mlrd.-a qədər azaltmaq mümkün oldu",- İ.Əliyev fevralın 11-də “Cənub” qaz dəhlizi (CQD) layihəsi üzrə Məşvərət Şurasının 7-ci iclasında bildirib.

Onun sözlərinə görə, layihəyə Azərbaycanın investisiyaları $10 mlrd. təşkil edib.

Azərbaycan prezidenti İlham Əliyev 29 May 2018-ci ildə “Cənub” qaz dəhlizini işə salıb.

CQD-nin əsas komponentləri aşağıdakılardır: "Şahdəniz-2" yatağının işlənməsi, Cənubi Qafqaz boru kəmərinin (Bakıdan Gürcüstan-Türkiyə sərhəddinə qədər) genişləndirilməsi, Türkiyədə TANAP-ın və Yunanıstan, Albaniya və İtaliyanın cənubunu birləşdirən Transadriatik qaz kəmərinin (TAP) tikintisi.

İ.Əliyev deyib ki, tezliklə Azərbaycan Türkmənistanla Xəzərdə "Dostluq" yatağının işlənməsi üzrə yekun müqavilə imzalamağa ümid edir.

O həmçinin bildirib ki,  Azərbaycan "Xəzərin şərq sahilindən enerji resurslarının nəqli üçün etibarlı ölkədir".

"Uzun illərdir ki, biz Xəzərin şərq sahilindəki tərəfdaşlarımız üçün Bakı-Tbilisi-Ceyhan neft kəməri və Azərbaycanın dəmir yolu sistemi vasitəsilə mühüm nəqliyyat marşrutlarını təqdim edirik və biz özümüzü etibarlı tranzit ölkə kimi tanıtmışıq", -  o deyib. -0-