Prezident İlham Əliyev: “Ermənistan Azərbaycanın ərazi bütövlüyünü tanımalı və işğalçı qoşunları çıxarmalıdır”

Bakı/04.10.20/Turan:  Bu gün Cəbrayıl şəhəri ilə yanaşı bu rayonun 9 kəndi - Karxulu, Şükürbəyli, Yuxarı Maralyan, Çərəkən, Daşkəsən, Horovlu, Decal, Mahmudlu, Cəfərabad kəndləri azad edilib. Bu barədə prezident İlham Əliyev xalqa müraciətində bildirib.

Ötən gün Cəbrayıl rayonunun beş kəndi - Mehdili, Çaxırlı, Aşağı Maralyan, Şaybəy və Quycaq, sentyabrın 27 – də isə Böyük Mərcanlı və Nüzgər kəndləri azad edilib.

Beləliklə, hərbi əməliyyatlar başlandıqdan sonra Cəbrayıl rayon mərkəzi və rayonun 16 kəndi azad edilib.

İ.Əliyev qeyd edib ki, Azərbaycan münaqişənin sülh yolu ilə həllinə uzun müddət sadiq olub, münaqişənin beynəlxalq hüquq normaları əsasında mərhələli həlli variantını dəstəkləyib.

Lakin Ermənistan rəhbərliyi danışıqlardan boyun qaçırırdı, Paşinyan məqbul olmayan şərtlər irəli sürürdü.

“İndi yıxılıb diz çöküb yalvarır ki, atəşkəs bərpa olunsun. Atəşkəs Ermənistanın baş nazirinin xahişilə 2 il ərzində bərpa olunmuşdu. Məndən xahiş etmişdi ki, daxildə vəziyyət ağırdır, oradan-buradan məni sıxırlar, mənə vaxt verin, mən bu məsələni həll edəcəyəm, mən yeni fikirlərlə gəlmişəm. Mən keçmişdə nə olub hamısının üstündən xətt çəkmişəm, imkan verin, vaxt verin. Bir ildən sonra çıxış edib deyir ki, “Qarabağ Ermənistandır”. İndi desin “Qarabağ Ermənistandır”, - İ.Əliyev deyib. 

Prezidentin sözlərinə görə, indi ona olan zənglər əsnasında gedən söhbətlər əlbəttə ki, konfidensial xarakter daşıyır və bəzi hallarda indi soruşurlar bəs, sizin şərtiniz nədir? 

“Mənim şərtim birdir - çıxsın bizim torpaqlarımızdan, çıxsın, qarşıdurma dayansın. Amma sözdə yox, əməldə”, - İ.Əliyev qeyd edib. 

Onun sözlərinə görə, Ermənistan rəhbərliyi Azərbaycanın ərazi bütövlüyünü tanımalıdır. Deməlidir ki, işğal edilmiş torpaqlardan qoşunlarını çıxaracaq, necə ki, baza prinsiplərində bu, təsbit edilib. 

“Qoy o, (Paşinyan) Azərbaycan xalqının qarşısında üzr istəysin. Qoy desin ki, Qarabağ Ermənistan deyil. Nəhayət, qoşunların çıxarılmasının dəqiq qrafikini təqdim etsin”, - İ.Əliyev bildirib.

Yalnız bu şərtlərlə Azərbaycan atəşkəs rejimini bərpa edə bilər.

Əks təqdirdə, Ermənistan güc toplamaq və Azərbaycana yeni hücumlar etmək üçün atəşkəs rejimindən istifadə edəcək.

İ.Əliyev illərdir ki, Azərbaycana vədlər verən və təcavüzkara heç bir təsir göstərməyən bəzi xarici dövlətlərin və beynəlxalq təşkilatların mövqeyini tənqid edib. İndi isə Azərbaycan öz ərazi bütövlüyünün bərpası problemini özü həll etməyə başladığı bir vaxtda onlar əl-ayağa düşüblər, hərbi əməliyyatların dayandırılmasında təkid etməyə başlayıblar.

“Bu gün Cəbrayılın işğaldan azad edilməsi Ermənistana, onun havadarlarına dərs olmalıdır. Biz onlara dərs verdik. Biz tarixin ən şərəfli anlarını yaşayırıq. Biz ədaləti bərpa edirik, ərazi bütövlüyümüzü bərpa edirik. Azərbaycan xalqının ümidlərini doğrulduruq və bundan sonra da doğruldacağıq. Biz haqlıyıq, biz zəfər çalacağıq!”, - İ.Əliyev vurğulayıb. -06D-