Prezident İlham Əliyev: “Gəncəyə raket zərbəsi hərbi cinayətdir və Azərbaycan bunun cavabını döyüş meydanında verəcək”

Bakı/17.10.20/Turan:  Ermənistanın Gəncəyə yeni raket zərbəsi hərbi cinayətdir və Azərbaycan bunun cavabını verəcək. Lakin Azərbaycanın cavab tədbirləri yalnız döyüş meydanında olacaq. Bu barədə Azərbaycan prezidenti İlham Əliyev xalqa bugünkü müraciətində bildirib.

Gəncədə çoxsaylı insan tələfatına səbəb olan yeni raket zərbəsi “Ermənistan rəhbərliyinin faşist mahiyyətini göstərir”, - İ.Əliyev vurğulayıb.

“Birinci dəfə deyil ki, bizim şəhərlərimiz atəşə məruz qalır. Demək olar ki, hər gün Tərtər, Ağdam, Goranboy, Ağcabədi və digər şəhərlərə Ermənistan atəş açır. Bu atəş nəticəsində vətəndaşlarımız həlak olur, yaralanır, 2 mindən çox ev dağıdılıb, ya da ki, bu evlərə çox böyük ziyan vurulub. Ancaq bu namərd hərəkətlər Azərbaycan xalqının iradəsini qıra bilməz. Ermənistan rəhbərliyi hərbi cinayət törədir. Dinc əhaliyə atəş açmaq, özü də əməliyyat operativ raket kompleksləri vasitəsilə atəş açmaq hərbi cinayətdir. Onlar bu cinayətə görə məsuliyyət daşımalıdırlar və daşıyacaqlar”, - İ.Əliyev şənbə günü televiziya ilə xalqa müraciətində deyib.

Prezident qeyd edib ki, Azərbaycan Ermənistanın cavabıbı döyüş meydanında verir.

“Şəhidlərin, günahsız insanların qisasını döyüş meydanında alırıq və alacağıq. Biz heç vaxt mülki əhaliyə qarşı mübarizə, müharibə aparmamışıq, bundan sonra da aparmayacağıq. Biz ermənilər deyilik ki, silahsız insanları öldürək.

Mən demişəm ki, öz xoşları ilə bizim torpaqlarımızdan çıxmasalar, biz onları iti qovan kimi qovacağıq və qovuruq. Müzəffər Azərbaycan ordusu hər gün yeni strateji məntəqələri, yeni yüksəklikləri, yeni yaşayış məntəqələrini işğalçılardan azad edir”, - İ.Əliyev vurğulayıb. -0-