Prezident İlham Əliyev Hadrut əməliyyatının yeri və əhəmiyyəti barədə

Bakı/16.03.21/Turan: Füzuli şəhəri Hadrutdan sonra, oktyabrın 17-də azad edildi. Ermənistan ordusu bizi digər istiqamətdə gözləyirdi. Ancaq müharibə qaydalarına əməl edərək, strateji planlaşdırmanı düzgün icra edərək biz Cəbrayıldan sonra Hadrutu, ondan sonra Füzulini işğaldan azad etdik. Bu barədə prezident İlham Əliyev ötən gün Hadruta səfəri zamanı deyib. 

Ermənistan hakimiyyəti Hadrutun itkisini uzun müddət gizlədirdi və məhz bundan sonra Azərbaycan qoşunlarının Şuşaya hücumu başlayıb.  “Hadrutun azad edilməsindən sonra biz Şuşaya istiqamət götürdük. “Şuşa əməliyyatının uğurlu keçirilməsi üçün məhz Hadrutu azad etmək önəmli idi. Yenə də düşmənin bizi gözləmədiyi istiqamətdən Şuşaya yaxınlaşdıq. Dağlardan, dərələrdən, sıldırım qayalardan keçərək, o qayaları dırmaşaraq biz Şuşanı işğalçılardan azad etdik. Ona görə Hadrut əməliyyatı dünyanın hərb elmində xüsusi yer tutacaq”, - prezident vurğulayıb.-02D-