Prezident İlham Əliyev Şuşadan separatçıları hədələyib

Bakı/15.01.21/Turan: "Bu gün Qarabağda özünü yerli hakimiyyət və siyasətçilər adlandıran bəzi cinayətkar ünsürlər revanş ideyaları ilə sayıqlayırlar. Eyni sözləri Ermənistandakı bəzi ünsürlər də təkrar edirlər.

“Mən onlara buradan, Şuşadan müraciət edirəm: əgər belə cəsarətlisiniz, cəhd edin! Biz artıq sizin başınızı sındırmışıq, belinizi qırmışıq və bunu bir daha edəcəyik. Amma bu dəfə zərbə qəti olacaq", - dövlət başçısı İlham Əliyev yanvarın 14-də Şuşa şəhərinə səfər zamanı bildirib.

"Şuşa işğalçılar tərəfindən dağıdılıb, bu, Köçəryan və Sarkisyan kimi cinayətkarların fəaliyyətinin nəticəsi idi. Bunu onlar törədiblər, onların ordusu cinayətlər törədib və bizim torpaqlarımızı işğal edib, abidələrimizi, müqəddəs yerlərimizi məhv ediblər. İkinci Qarabağ Müharibəsi başlayanda onlar siçovul kimi gizlənirdilər, burunlarını çıxarmaqdan qorxurdular. Onlardan biri buraya da gəldi, amma bir neçə gün sonra qaçdı. Hanı sizin ordunuz və qəhrəmanlığınız? Ermənistanda oturub revanş arzusundasınız? Ohanyan adlı başqa bir cinayətkar bizi təhdid etməyə çalışır. Hələ cəhd edin! Bu dəfə bizi heç nə dayandırmayacaq və məsələ tamamilə və birdəfəlik həll olunacaq!",- İ.Əliyev deyib. -02B-