Prezident Novruz bayramı münasibətilə xalqı təbrik edib

Bakı/18.03.21/Turan: Prezident İlham Əliyev Novruz bayramı münasibətilə Azərbaycan xalqını təbrik edib.

Təbrikdə bildirilib ki, yaz bayramının Odlar diyarına builki gəlişi xüsusən əlamətdardır.

“Ruhumuzun yenilməzliyinin təntənəsinə çevrilən və bizi dünyaya məğrur millət olaraq tanıdan şanlı zəfərimiz Azərbaycana əbədi bahar gətirdi”,-  dövlət başçısı qeyd edib.

Prezident vurğulayıb ki, xalqın qalibiyyət ovqatını bütün qəlbi ilə yaşadığı bu bayram günlərində bir daha vətənin ərazi bütövlüyü naminə canlarını fəda etmiş qəhrəman övladlara rəhmət diləyir, onların əziz xatirəsini dərin ehtiramla yad edir.

“İrəlidə bizi işğaldan azad olunmuş yurd yerlərimizdə nəhəng quruculuq işləri gözləyir. İnanıram ki, yaz fəslinin qurub-yaratmaq əzmimizi artıran yeniləşdirici ab- havası ilə həmahəng birlik və həmrəylik nümayiş etdirəcək, böyük qayıdış planımızı sülh və əmin-amanlıq şəraitində uğurla gerçəkləşdirəcək, doğma Qarabağı qısa müddətdə dirçəldəcəyik.

Hamınıza bahar əhval-ruhiyyəsi arzu edirəm. Bu bayram öz gəlişi ilə evinizə, ocağınıza bol ruzi-bərəkət və firavanlıq gətirsin!

Novruz bayramınız mübarək olsun!”, - təbrikdə qeyd edilir.-03-