Qarabağ ermənilərinin hüquqları və təhlükəsizliyi Azərbaycan dövləti tərəfindən təmin ediləcək - İ.Əliyev

Bakı/25.09.23/Turan: Qarabağ ermənilərinin hüquqları və təhlükəsizliyi Azərbaycan dövləti tərəfindən təmin olunacaq, bu barədə Azərbaycan prezidenti İlham Əliyev sentyabrın 25-də Naxçıvanda Türkiyə prezidenti Recep Tayyip Erdoğanla görüşdən sonra bildirib.

"Qarabağ bölgəsində yaşayan insanlar, milli mənsubiyyətlərindən asılı olmayaraq, Azərbaycan vətəndaşlarıdır", deyə Əliyev qeyd edib. Onların təhlükəsizliyi, müdafiəsi və hüquqları Azərbaycan dövləti tərəfindən təmin ediləcək, deyə o, əlavə edib.

"Bir neçə gün əvvəl Yevlax şəhərində Qarabağ ermənilərinin nümayəndələrinin Azərbaycanın dövlət qurumlarının nümayəndələri ilə görüşü keçirilib. Bu gün ikinci görüş keçirilir", deyə Əliyev qeyd edib.

Dövlət başçısı "Qarabağda yaşayan erməni əhalinin Azərbaycan cəmiyyətinə inteqrasiyası prosesinin uğurlu olacağından" əminliyini bildirib.

"Azərbaycanın Qarabağda həyata keçirdiyi antiterror əməliyyatı qürur mənbəyidir. Əməliyyat, mülki əhalinin hüquqları maksimum nəzərə alınmaqla, qısa müddətdə uğurla həyata keçirilib", deyə öz növbəsində Erdoğan bildirib. "Ermənistanın ona uzadılmış sülh əlini qəbul edəcəyini və bundan sonra da səmimi addımlar atacağını gözləyirik", deyə o, əlavə edib.

İki dövlət başçısı Iğdır-Naxçıvan qaz boru kəmərinin bünövrəsinin qoyulması mərasimində iştirak ediblər.

"Iğdır-Naxçıvan qaz boru kəmərinin açılması Türkiyənin Azərbaycanla energetika sahəsində tərəfdaşlığını daha da dərinləşdirəcək", deyə Erdoğan qeyd edib.

Boru kəmərinin ümumi uzunluğu 160 km-dir, bunun 85 km-i Türkiyə ərazisindən keçəcək. Qaz Türkiyədən TANAP boru kəmərindən daxil olacaq. Layiyə 2024-cü ildə təhvil veriləcək. Qaz boru kəmərinin buraxılış qabiliyyəti ildə 500 mln. kubmetr təşkil edəcək.

Bu gün həmçinin Qars-Naxçıvan dəmir yolunun tikintisi haqqında niyyət protokolu imzalanıb.

Naxçıvan eksklavı - Azərbaycanın Naxçıvan Muxtar Respublikası 1990-cı illərin əvvəllərində, Ermənistanın Azərbaycana qarşı təcavüzündən sonra ölkənin qalan hissəsi ilə quru əlaqəsini itirib.

Uzun müddət muxtar respublika ilə hava əlaqəsi olub. Sonradan İran ərazisindən keçməklə yerüstü nəqliyyat əlaqəsi yaradılıb. Eyni zamanda, İran ərazisindən svop mübadiləsi ilə qaz tədarükü həyata keçirilməsinə başlanıb. 06B