Qarabağda atəşkəs müvəqqəti, humanitar xarakter daşıyır – rəsmi Bakı

Bakı/10.10.20/Turan: Qarabağ münaqişəsi zonasında atəşkəs əldə olunması müvəqqəti xarakter daşıyır və humanitar əsaslara malikdir. Danışıqlar prosesinin vaxt çərçivəsi olmalıdır və işğalçı qoşunların Azərbaycan ərazilərindən çıxarılmasında irəliləyiş olmasa, hərbi əməliyyatlar bərpa ediləcək. Azərbaycanın məqsədi müvəqqəti atəşkəs deyil, ərazi bütövlüyünü bərpa etməkdir. Azərbaycan XİN başçısı Ceyhun Bayramovun və Azərbaycan prezidentinin köməkçisi Hikmət Hacıyevin Azərbaycan və Ermənistan nazirlərinin Moskva görüşünün yekunlarına həsr olunmuş bugünki mətbuat konfransında səsləndirdikləri əsas fikir bundan ibarət idi. 

Şənbə günü saat 12.00-dan etibarən atəşkəs haqqında razılıq əldə olunmasına baxmayaraq, Ermənistan elə ilk dəqiqələrdən razılaşmanı pozub, deyə prezidentin köməkçisi Hikmət Hacıyev mətbuat konfransında bildirib.

O qeyd edib ki, atəşkəs sazişi humanitar əsaslarla bağlanıb və müvəqqəti xarakter daşıyır.

Bununla belə, Hacıyev deyib ki, sülhə məcbur etmək üzrə hərbi əməliyyatların birinci mərhələsi uğurla başa çatıb və Azərbaycan beynəlxalq ictimaiyyətin məsuliyyətli üzvü olaraq, çoxsaylı müraciətləri nəzərə alaraq, Moskvada danışıqlarda iştirak etmək təklifini qəbul edib.

O deyib ki, danışıqların əsas məqsədi müvəqqəti atəşkəs deyil, Azərbaycanın ərazi bütövlüyünün və suverenliyinin təmin edilməsidir. 

“Əsgərlərimizin uğurlarını diplomatik cəbhədə davam etdirməliyik. Hərbi qələbələrimizin davamı olaraq, diplomatik cəbhədə də üstünlüyümüz davam edir”, deyə Hacıyev bildirib.

O qeyd edib ki, danışıqlar prosesində yeni vəziyyət yaranır – Azərbaycan ordusunun uğurlu əməliyyatlarından, işğal edilmiş ərazilərin əhəmiyyətli hissəsinin azad edilməsindən sonra artıq status-kvo dəyişib, Ermənistan tərəfin “sərhəd” kimi təqdim etdiyi qoşunların təmas xətti yoxdur.

“Bundan sonra ATƏT-in Minsk Qrupunun həmsədrləri nəticəyə yönəlmiş danışıqların davam etdirilməsini təmin etməlidir. Yəni erməni qoşunlarının işğal edilmiş ərazilərdən çıxarılması planı hazırlanmalıdır. Bugünki siyasi dinamika bu nəticəyə yönəlməlidir. Ermənistan qoşunları işğal edilmiş ərazilərdən çıxarılmadan Cənubi Qafqazda sülh təmin edilə bilməz. Həmsədr ölkələr səylərini daha da səfərbər etməlidir, erməni qoşunları işğal edilmiş ərazilərdən çıxarılmalıdır”, deyə Hacıyev bildirib.

Öz növbəsində, Azərbaycan XİN başçısı Ceyhun Bayramov Moskva bəyanatının danışıqlar prosesinin əvvəlcədən qəbul edilmiş təməl həll prinsipləri ilə davam etdirilməsi və danışıqlar formatının dəyişməz olaraq qalması haqqında bəndlərinə diqqət çəkib.

Formatın dəyişməməsi o deməkdir ki, danışıqlar Azərbaycan və Ermənistan arasında, son zamanlar Yerevanın israr etdiyi üçüncü tərəf, yəni işğalçı rejim cəlb edilmədən davam etdirilməlidir.

Azərbaycan XİN başçısı Ceyhun Bayramov əsir və həlak olanların cəsədlərinin dəyişdirilməsi müddəti barədə suala cavabda deyib ki, bu əməliyyatı Qırmız Xaç Komitəsi hazırlayacaq və əlaqələndirəcək.

“Hələlik bu əməliyyatların başlaması üçün şərait yaradılmayıb. Çünki Ermənistan növbəti dəfə təxribata əl atıb. Bu gün saat 12-də atəşkəs başlamalı idi, amma Ermənistan hücum cəhdi edib, amma dəf edilib”, deyə Bayramov bildirib.

Münaqişənin nizamlanmasında Türkiyənin roluna gəlincə, prezidentin köməkçisi Hacıyev qeyd edib ki, Ankara artıq ATƏT-in Minsk Qrupunun üzvü kimi danışıqlar masası arxasındadır.

“Cənubi Qafqazda baş verən proseslər qardaş Türkiyəni də narahat edir, o, səy göstərməyə davam edir. Qardaş Türkiyənin region dövləti olaraq həm Minsk Qrupunda, həm də başqa formatlarda yaxından iştirakı gözlənilir”, deyə Hacıyev bildirib. -06В-