Qırğızıstan "Cənubi Qafqaz-Mərkəzi Asiya" regionlararası platformanın yaradılmasını təklif edir

Bakı/02.07.21/Turan: Azərbaycan və Qırğızıstan xarici işlər nazirləri Ceyhun Bayramovla Ruslan Kazakbayevin bugünkü görüşündə ikitərəfli münasibətlərin inkişafı və möhkəmləndirilməsi məsələləri müzakirə olunub.

Azərbaycan Xarici İşlər Nazirliyinin mətbuat xidmətinin məlumatına görə, görüşün yekunlarına əsasən iki ölkə Xarici İşlər nazirlikləri arasında 2021-2022-ci illər üzrə əməkdaşlıq proqramı imzalanıb.

Öz növbəsində Qırğızıstan Xarici İşlər Nazirliyi bildirib ki, Kazakbayev Qırğızıstan prezidenti Sadır Japarovun təşəbbüslərini rəsmi Bakıya təqdim edib.

Təşəbbüslər strateji tərəfdaşlığın qurulmasını və Azərbaycan və Qırğızıstan prezidentləri səviyyəsində Dövlətlərarası Şuranın yaradılmasını nəzərdə tutur.

Bundan əlavə, 5+3 formatında "Mərkəzi Asiya - Cənubi Qafqaz" regionlararası platformanın yaradılması nəzərdə tutulur", - İnterfaks  Qırğızıstan Xarici İşlər Nazirliyinə istinadən bildirib.

Mənbənin məlumatına görə, tərəflər birgə investisiya fondunun yaradılması, birbaşa hava əlaqəsinin bərpası, mədəni mübadilə məsələlərini də müzakirə ediblər. -02D-