Rəsmi şəxslər düşmən qüvvələr axtarışında bir-biri ilə yarışırlar

Bakı/16.07.18/Turan: Son günlər rəsmi KİV və hakimiyyətin nəzarəti altında olan informasiya resursları çoxsaylı "ekspertlərin" və "politoloqların" iyulun 3-də və 10-da Gəncədə baş vermiş hadisələrin səbəbləri haqqında kəşflərini bölüşdükləri tribunaya çevrilib.

Parlamentin deputatları, qəzet redaktorları və tənbəllik etməyən hər kəs, sən demə, Gəncədəki hadisələrin xarici düşmənlərin, ermənipərəst qüvvələrin və radikal müxalifətin işi olduğunu dəqiq bilirlərmiş.

Şifahi ittihamlar siyahısı getdikcə genişlənir, hər hansı dəlil verilmir. "Ekspertlərin" fantaziyası həddindən artıq genişdir, məsələn, Gəncə hadisələrinin düşmənlərin TANAP qaz kəmərinin işə salınmasına cavabı olduğunu (!) bəyan edən Mətbuat Şurasının rəhbəri Əflatun Amaşovun kəşfi kimi.

Digər şərhçilər lənət, xaricdən idarə olunan dini radikalların əməli olduğunu təkrar edir.

Bu gün deputat Qüdrət Həsənquliyev də, demək olar ki, açıq şəkildə Gəncə hadisələrinin arxasında Rusiyanın durduğunu bəyan edərək, təəccübləndirib. Amma o, bu kəşfinin nəyə əsaslandığını bildirmir. Həsənquliyev ənənəvi olaraq Rusiyapərəst mövqeyi ilə məşhur olması və Rusiya Qarabağ məsələsində yardım edərsə, KTMT-yə və Gömrük İttifaqına daxil olmağın tərəfdarı olduğuba görə, bu, təəccüb doğurur.

Belə "informasiya" bolluğunda rəsmi Bakı susur və Gəncə hadisələrinin səbəbləri ilə bağlı heç bir məlumat vermir. Bu arada, ölkənin bir çox şəhərlərində və rayonlarında təhlükəsizlik tədbirləri güclənir, polis insanların bir yerə toplaşmasına imkan vermir. Şəxsi söhbətlərdə polis işçiləri baş verənləri yeni etirazlar olacağı ehtimalı ilə izah edirlər. -02B-